“Ҳелло Magar” Венгрия янгиликлар порталида “Марказий Осиё қандай қилиб географияни кучга айлантирмоқда” сарлавҳаси остида мақола эълон қилинди.

Ушбу мақолада қайд этилишича, Ўзбекистон денгизга чиқиш имконияти йўқ давлат сифатида халқаро савдо ва иқтисодий ҳамкорликда юксалишга эришиш учун самарали транспорт ва логистика инфратузилмасини яратишга катта аҳамият бермоқда. Мамлакат географик жиҳатдан транзит нуқтаси сифатида Марказий Осиёни Хитой, Жанубий Осиё, Европа ва Кавказ билан боғлайдиган муҳим кўприкка айланиш имкониятига эга.

Бу мақсадда “Хитой – Қирғизистон – Ўзбекистон” ва “Ўзбекистон – Афғонистон – Покистон” каби темир йўл лойиҳалари амалга оширилмоқда. Улар юк ташиш вақтларини ва харажатларини қисқартириш орқали минтақавий савдони рағбатлантиради. 

Мақолада таъкидланишича, транспорт изоляцияси туфайли Марказий Осиё мамлакатлари жаҳон савдосида етарли даражада иштирок этилмаяпти, экспорт харажатлари жуда юқори. Лекин Ўзбекистонда транспорт харажатларини камайтириш, логистика жараёнларини рақамлаштириш, замонавий технологияларни жорий этиш ва электрон ҳужжатлар тизимини кенгайтириш орқали бу ҳолатга босқичма-босқич барҳам берилаётгани қайд этилган. Шунингдек, Ўзбекистонда TIR (Транспорт Интернационал Роутер) ва e-TIR каби халқаро стандартларга мос рақамли ташиш тизимлари жорий этилгани, қўшни давлатлар билан электрон ҳужжатлар алмашинуви йўлга қўйилгани транспорт соҳасидаги ислоҳотларнинг муҳим натижалари сифатида келтирилган.

Келтирилган таклиф ва хулосалар халқаро ҳамкорликни янада мустаҳкамлашга қаратилган бўлиб, жумладан, БМТ доирасида глобал рақамли транспорт ҳужжатлари стандартларини ишлаб чиқиш, контейнерли ташишни кенгайтириш ва рақамли савдо экотизимини яратиш бўйича ташаббуслар таклиф этилган. Шу билан бирга, логистика соҳасида билим ва тажриба алмашиш платформаларини яратиш, рақамли савдо ва транспорт соҳасидаги инновацияларни жорий этиш орқали денгизга чиқиши йўқ давлатларнинг глобал иқтисодиётдаги иштирокини кенгайтириш зарурлиги таъкидланган.

• OAV
• Транзит
• Vengriya
• maqola