Qozog‘istondagi tartibsizliklar vaqtida 14 nafar o‘zbekistonlik qo‘lga olingan va ular tergov izolyatorida saqlanmoqda. Bu haqda Qozog‘iston Ombudsmani Elvira Azimova ma’lum qildi.

“Ommaviy tartibsizliklar sabab hibsga olinganlar orasida tergov izolyatorlarida 18 nafar xorij fuqarosi saqlanmoqda. Ularning 14 nafari – O‘zbekiston, ikki nafari – Rossiya, qolgan ikki nafari esa Qirg‘iziston fuqarosi”, – degan Elvira Azimova “Xabar” telekanaliga bergan intervyusida.

Azimova hibsga olingan fuqarolar saqlanayotgan yopiq muassasalarda o‘tkazilgan monitoring natijalarini ham ma’lum qildi.

Uning aytishicha, hibsxonalarda 6-yanvardan keyin dastlabki 48 soat ichida ichimlik suvi va oziq-ovqat ta’minotida ayrim kamchiliklar bo‘lgan. Bu o‘sha paytda vaqtinchalik saqlash hibsxonalari va qo‘shimcha binolarda hibsga olinganlar sonining ortib ketishi bilan bog‘liq bo‘lgan. 10-yanvardan keyin esa mahbuslarga jo‘natmalar qabul qilishga ruxsat berilgan. Ayni paytda oziq-ovqat ta’minotida kamchiliklar yo‘q”, – deydi Ombudsman.

Eslatib o‘tamiz, avvalroq Azimova yanvar voqealarida hibsga olinganlar orasida Tojikiston va Xitoy fuqarolari ham borligini ma’lum qilgan edi.

• Namoyish
• O‘zbekiston
• Qozog‘iston