Qozog‘istondan yanvar voqealarida ishtirok etganlikda gumonlanib 11 nafar o‘zbekistonlikka nisbatan jinoyat ishi qo‘zg‘atilgan. Bu haqda Qozog‘iston Bosh prokurori Berik Asilov maʼlum qildi.

Uning so‘zlariga ko‘ra, jami 19 nafar xorij fuqarosiga nisbatan ayni shu mazmundagi jinoyat ishi qo‘zg‘atilgan. Yaʼni hozirda O‘zbekiston fuqarolaridan tashqari 4 nafar Rossiya, 2 nafar Qirg‘iziston, 1 nafar Tojikiston hamda 1 nafar Xitoy fuqarolari tartibsizliklardagi ishtiroki uchun tergovga jalb qilingan. 

Bosh prokuratura xabariga ko‘ra, o‘sha kunlari namoyishga jami 50 ming atrofida aholi chiqqan.

Eslatib o‘tamiz, bir muddat oldin mamlakatdagi yanvar voqealarida ishtirok etganlikda ayblanib 14 nafar O‘zbekiston fuqarosi hibsga olingani haqida xabar berilgan va shu munosabat bilan O‘zbekistonning Nur-Sulton shahridagi elchixonasi hibsga olingan o‘zbekistonliklarning holati haqida maʼlumot olish uchun Qozog‘iston TIVga nota yuborgan edi. 

Shuningdek, joriy yil 9-mart kuni Qozog‘istonda yanvar voqealari ishtirokchisi bo‘lgan yana bir o‘zbekistonlik qo‘lga olingani va uning tartibsizliklarda katta partiyadagi qurol-yarog‘larni o‘margani aytilgan edi.

• Namoyish
• O‘zbekiston
• Qozog‘iston
• Yanvar