Tadqiqot natijalariga ko‘ra, taxminan 500-yildan so‘ng barcha Yaponiya fuqarolarining familiyasi bir xil bo‘lishi mumkin, deb xabar beradi “The Guardian”.

Toxoku universiteti iqtisod professori Xirosi Yosido tomonidan olib borilgan tadqiqotga ko‘ra, agar Yaponiya er-xotinlardan bir xil familiya tanlashni talab qilsa, 2531-yilga borib har bir yaponiyalik “Sato-san” familiyasiga ega bo‘ladi.

Sato allaqachon Yaponiyada eng keng tarqalgan familiya bo‘lib, 2023-yilda aholining 1,5 foizini tashkil qildi.

Yosidaning hisob-kitoblariga ko‘ra, Sato familiyasiga ega yaponlarning ulushi 2022-yildan 2023-yilgacha 1,0083 marta oshdi va 2446-yilda yapon aholisining deyarli yarmi bu familiyaga ega bo‘ladi.

Biroq, agar Yaponiya hukumati er-xotinlarga turli familiyalardan foydalanishga ruxsat bersa, vaziyat boshqacha bo‘lar edi.

Yaponiyada er-xotinlar nikohdan keyin o‘z familiyalarini tanlaydilar, ammo 95% hollarda familiyasini ayollar o‘zgartiradi.

Garchi hukumat nikohdan keyin pasport va haydovchilik guvohnomalarida qizlik familiyasidan foydalanishga ruxsat bersa ham Yaponiya er-xotinlar bir xil familiyadan foydalanishni talab qiladigan dunyodagi yagona davlatdir.

• Yaponiya
• familiya