O‘zbekistonda har yili aprel oyi “Amir Temur oyligi” deb e’lon qilinadi va bunda ta’lim tashkilotlari va mahallalarda temurshunos olimlar, yozuvchi va san’atkorlar ishtirokida uchrashuvlar uyushtiriladi. Bu haqda Prezidentning “Buyuk davlat arbobi va sarkarda, ilm-fan, madaniyat va san’at homiysi Sohibqiron Amir Temur tavalludining 690 yilligini keng nishonlash to‘g‘risida”gi qarorida so‘z boradi.

Shunungdek, quyidagilarni nazarda tutuvchi 2030-yilgacha mo‘ljallangan “yo‘l xaritasi” tasdiqlandi, jumladan:

- 9–10-aprel kunlari Islom sivilizatsiyasi markazida “Amir Temur va temuriylar tamaddunining jahon tarixi va madaniyatidagi o‘rni va ahamiyati” mavzusida xalqaro ilmiy konferensiya o‘tkazish;

- “Temur tuzuklari” asarining ilmiy izohli matnini fors, arab, xitoy, ingliz, fransuz, ispan va rus tillarida chop etish;

- “Temuriylar davrining 100 nodir qo‘lyozmasi”, “Temuriylar davrining 100 nodir durdonasi” kitob-albomlarini yaratish;

- Temuriylar davri manbalari elektron platformasini yaratish.

Bundan tashqari, Amir Temur tavalludining 690 yilligiga bag‘ishlangan pochta markalari va konvertlar, taqvimlar va ko‘rgazmali axborot vositalari turkumi yaratiladi hamda esdalik, kumush va oltin yubiley tangalari muomalaga chiqariladi.

• Amir_Temur
• Esdalik tanga
• Prezident
• Qaror
• Shavkat Mirziyoyev