Andijon shahar hokimi katta miqdorda byudjet mablag‘larini talon-taroj qilganlikda gumonlanib qamoqqa olindi.

Bosh prokuratura Matbuot kotibi Hayot Shamsutdinovga ko‘ra, jinoyat ishi doirasida 6 iyun kuni Andijon shahar sobiq hokimi gumonlanuvchi tariqasida protsessual tartibda ushlangan.

Ish bo‘yicha haqiqatni aniqlashga to‘sqinlik qilish holatlarining oldini olish maqsadida esa boshqa tafsilotlar oshkor qilinmaydi.

Eslatib o‘tamiz, Andijon shahar hokimi Bahrom Haydarov katta miqdorda byudjet mablag‘larini talon-taroj qilganlikda gumonlanib tergovga jalb qilingan edi.

Kunuz nashrining yozishicha, Andijon shahar hokimi eski lavozimida (viloyat moliya boshqarmasi boshlig‘i) ishlagan vaqtda sheriklari bilan 48 mlrd so‘m byudjet mablag‘larini talon-toroj qilgan. Bosh prokuratura tomonidan olib borilayotgan tergov ishi doirasida 37 nafar shaxsga nisbatan ayblov eʼlon qilinib, ularning 32 nafari qamoqqa olingan. Hozircha yetkazilgan zararning atigi 23 foizi qoplangan. Tergovni Bosh prokuraturaning Uyushgan jinoyatchilik va korrupsiyaga qarshi kurashish boshqarmasi olib borayotgani maʼlum.

Bahromjon Haydarov avvalroq hokim sifatida ham yer ajratish bilan bog‘liq qonunbuzarliklar oqibatida davlat manfaatlariga 1,7 milliard so‘mdan ortiq zarar keltirgan.

Haydarov, shuningdek, joriy yil 28-may kuni deputat dahlsizligi huquqidan mahrum qilingan edi.

• Andijon
• Bosh prokuratura
• Byudjet
• Jinoyat
• hokim