Reuters xabariga ko‘ra, AQSh davlat kotibining qurol-yarog‘larni nazorat qilish va xalqaro xavfsizlik masalalari bo‘yicha o‘rinbosari Tomas Dinanno Jenevada bo‘lib o‘tgan global qurolsizlanish konferensiyasi chog‘ida Xitoyni 2020-yilda yashirin yadroviy sinovlar o‘tkazganlikda ayblagan hamda Pekinni ham qamrab oladigan strategik qurollarni nazorat qilish bo‘yicha keng qamrovli bitim tuzishni taklif qilgan.

Dinanno AQSh hukumati Xitoy tomonidan yadroviy portlash shaklida sinovlar o‘tkazilganidan xabardorligini bildirdi. Uning so‘zlariga ko‘ra, Pekin sinovlarni yashirishga uringan, xususan seysmik monitoring tizimlarining ishlashiga xalaqit bergan. Qayd etilishicha, sinovlardan biri 2020-yil 22-iyun kuni o‘tkazilgan.

Xitoyning qurolsizlanish bo‘yicha elchisi Shen Szyan AQSh tomonining ayblovlariga bevosita javob bermagan. Biroq Xitoy yadroviy qurol masalasida o‘zini vazmin va mas’uliyatli tutishini ta’kidladi hamda qurollanish poygasini keskinlashuviga sabab bo‘lishda AQShni aybladi.

Yadro sinovlarini to‘liq taqiqlash to‘g‘risidagi shartnoma tashkilotining ijrochi kotibi Robert Floyd esa tashkilot monitoring tizimlari Xitoy tomonidan taxmin qilinayotgan sinovlar vaqtida hech qanday shubhali holatni aniqlamaganini bildirdi.

• AQSh
• Xitoy
• Yadroviy qurol