Kecha, 5-noyabr kuni AQShning Missisipi shtati Yazu shahridagi CF Industries ammiak ishlab chiqarish zavodida katta portlash sodir bo‘ldi. Bu haqda The Washington Post xabar berdi.

Nashr ma’lumotiga ko‘ra, hodisa sodir bo‘lgan zavod vodorod va azot mahsulotlari, jumladan ammiak va o‘g‘itlar ishlab chiqaradi. Portlash oqibatida halok bo‘lganlar yoki jarohatlanganlar haqida hozircha ma’lumot yo‘q. CF Industries kompaniyasi “hodisa vaqtida obyekt ichida bo‘lgan barcha xodimlar va pudratchilar xavfsiz tarzda evakuatsiya qilinganini” ma’lum qilgan.

Shu bilan birga, shtat hokimiyati aholiga hozircha ko‘chaga chiqmaslikni tavsiya qilmoqda, chunki zavoddan zaharli moddalar sizib chiqishi hali bartaraf etilmagan. Hodisa joyiga yaqin yashovchilarga esa evakuatsiya qilish buyurilgan.

Shtat gubernatori Teyt Rivzning so‘zlariga ko‘ra, shtatning Favqulodda vaziyatlar agentligi, Atrof-muhit sifati departamenti va Jamoat xavfsizligi departamenti mahalliy favqulodda holat rahbarlariga yordam ko‘rsatmoqda.

• AQSh
• portlash
• zavod