AQShning immigratsiya va bojxona xizmati (ICE) xodimi Minneapolisda o‘tkazilgan reyd vaqtida 37 yoshli AQSh fuqarosi bo‘lgan ayolni otib o‘ldirgan.

Qo‘shma Shtatlar Ichki xavfsizlik vaziri ayol ICE agentlarini mashina bilan bosib ketishga uringanini, shu sababli xodimlardan biri uni “o‘zini himoya qilish maqsadida” otganini bildirdi. Prezident Donald Tramp ham ushbu bayonotni qo‘llab-quvvatlagandi.

Minneapolis meri Jeykob Frey Tramp ma’muriyatining agent o‘zini himoya qilish uchun o‘q uzgan degan bayonotini qat’iyan rad etdi. Frey federal immigratsiya agentlarini shaharda tartibsizlik chiqarishda ayblab, ICE’ga qarata: “Minneapolisdan yo‘qolinglar”, – dedi. Shu bilan birga, u aholini xotirjamlikka chaqirdi. Minnesota, Vashington va boshqa shtatlardagi demokrat rahbarlar ICE operatsiyasini “keraksiz provokatsiya va fojia bilan yakunlangan harakat” deb atamoqda.

Nyu-York meri Zohran Mamdani bundan keyin migratsiya xizmati agentlariga tekshiruvlarda yordam bermasligini bildirgan.

AQSh Ichki xavfsizlik vazirligining ma’lum qilishicha, Minnesotada 2 000 ofitser jalb qilingan “tarixdagi eng yirik operatsiya” o‘tkazilmoqda. Unda “firibgarlar, qotillar, zo‘ravonlar va jinoiy to‘dalarni” qo‘lga olish maqsad qilingan.

• AQSh
• norozilik