Kundalik hayotimiz uchun zarur boʻlgan yumushlarni har kuni bajarish biz uchun oddiy hol boʻlib qolgan. Masalan, yaqinlarimiz uchun ovqat pishirish, qiziqqan mashgʻulotimiz bilan shugʻullanish. Lekin baʼzida arzimasdek koʻrinadigan, ammo hayotimizga jiddiy taʼsir koʻrsatishi mumkin boʻlgan shunday vazifalar borki, ularni yiliga kamida bir marotaba bajarishimiz shart. Bu galgi maqolada ana shu vazifalar haqida suhbatlashamiz.

Tibbiy koʻrikdan oʻtishni unutmang

Yilda bir marotaba boʻlsa ham shifokor koʻrigidan oʻtish zarar qilmaydi. Axir profilaktik tekshiruvlar natijasida kasallikni oldini olish yoki erta bosqichda aniqlash mumkin. Bu sogʻligimizda boʻlishi mumkin boʻlgan jiddiy muammolarning oldini oladi. Biroq koʻpchilik aynan qaysi shifokorlarning tekshiruvidan oʻtish kerakligini bilmaydi.  Ginekolog/urolog, stomatolog, oftalmolog, okulist va nevropatolog  yiliga kamida bir marta tashrif buyurish lozim boʻlgan shifokorlar qatoriga kiradi.

Uy hayvoningizni veterinarga olib boring

Agar uy hayvoningiz boʻlsa, uni vaqti-vaqti bilan veterinarga koʻrsatish ortiqcha boʻlmaydi. Hayvonlar ham tez-tez kasal boʻlishadi, ammo qayeri ogʻriyotganini ayta olmaydi. Ayniqsa, u boshqa insonlar yoki hayvonlar bilan koʻproq aloqada boʻlsa, bu xavf yanada ortadi. Shuning uchun, siz uy hayvoningizga ham gʻamxo‘rlik qilishingiz, vaqtida emlatishingiz lozim. 

Uylarni tozalab, keraksiz narsalardan xalos boʻling

Uyni tez-tez tozalab turish, changlar va besaramjonlikdan xalos boʻlish nafaqat sogʻligʻingizga, balki kayfiyatingizga ham oʻzgacha taʼsir qiladi. Oyna-yu pardalarni yuvish, maishiy texnika va yumshoq mebellarni tozalash hamda uyingizdagi uzoq muddatdan beri ishlatilmaydigan keraksiz narsalarni saralash esa yiliga kamida ikki-uch marotaba qilinishi zarur boʻlgan ishlardan biridir. 

Garderobingizni qayta koʻrib chiqing

Garderobda kiyilmaydigan kiyimlaringiz boʻlishi aniq, ayniqsa, yillab shkafda joy egallab turganlarini aytmasa ham boʻladi. Yiliga kamida bir marotaba baʼzi narsalardan voz kechish eng toʻgʻri qaror. Bu kelgusi mavsum uchun qanday kiyim sotib olishingiz kerakligini va ularni oʻzingizda bor narsalar bilan qanday moslashtirib yangi obraz yaratishingiz mumkinligi haqida oʻylab koʻrishingizga imkon beradi.

Moliyaviy ahvolingizni tahlil qiling

Moliyaviy ahvolingizni baholash yaqin kelajak uchun taxminiy xarajatlar va qoʻshimcha daromadlar haqida rejalar tuzib olish uchun yordam beradi. Albatta, qoʻshimcha daromadingizni yanada koʻpaytirish uchun nimalar qilishingiz kerakligi haqida haqida oʻylab koʻring. Balki bankga shaxsiy depozitingizni qoʻyarsiz yoki qimmatli qogʻozlar sotib olishingiz mumkin. Bundan tashqari, kutilmagan katta xarajatlarga ham pul jamgʻarib qoʻyishingiz uchun ham moliyaviy imkoniyatlaringizni puxta tahlil qilib olishingiz zarur.

Gadjetlaringizni “tozalang”

Gadjetlaringizda anchadan beri foydalanilmaydigan ilovalar yoki dasturlar, oʻnlab deyarli bir xil boʻlgan fotosuratlar, allaqachon koʻrib boʻlingan filmlar yoki hozir sizga qiziq boʻlmagan bloglar bor. Bu kabi narsalarni vaqti-vaqti bilan saralash foydadan xoli boʻlmaydi. Birinchidan, gadjetingiz xotirasi biroz boʻlsa ham boʻshaydi. Ikkinchidan, keraksiz axborotlardan qutilib, yangi musiqa, filmlar va ilovalarni oʻrnatish ham dunyoqarashingizni yana-da oʻsishiga, yangi narsalarni oʻrganishingizga yordam beradi.

Avtomobilingizni ham yodingizdan chiqarmang

Profilaktik tekshiruv hamma narsa, shu jumladan, sizning mashinangiz uchun ham foydalidir. Albatta, avtomobilingizni qanchalik tez-tez tekshirish va taʼmirlash kerakligi uni ishlatish chastotasiga bogʻliq. Biroq har yili hech boʻlmaganda bir marotaba dvigatelning holatini, tormozlarning ishlashga yaroqliligini, gʻildiraklar va shinalarning muvofiqligini, rul boshqaruvining ishlashini tekshirib turing. Bularning barchasi sizning qulayligingiz va xavfsizligingizga bevosita taʼsir qiladi. Shuning uchun siz texnik tekshiruvlarni ham eʼtiborsiz qoldirmasligingiz kerak.

Maqsadlarni rejalashtiring va belgilang

“Men nimani xohlayman?”, “Hayotimda nimani oʻzgartirishim kerak?”, “Bu yil oldimga qoʻygan maqsadlarimni necha foiziga erishdim, rejalarim qanday?”, deb oʻzingizdan soʻrab turing. Bu maqsadingizga erishish uchun nimalar kerakligini, qanday qiyinchilik va imkoniyatlarga duch kelishingiz mumkinligini tushunishga yordam beradi. Maqsadni toʻgʻri belgilash rejalarni muvaffaqiyatli amalga oshirish kalitidir. Oʻylagan gʻoyalaringizning afzalliklarini, kamchiliklarini va mumkin boʻlgan xavflarni baholang va keyin rejani amalga oshirishga oʻting.

Massaj kursiga yoziling

Juda oddiy narsa boʻlib tuyulishiga qaramay, bu ham tanangiz, ham ruhiy salomatligingiz uchun juda zarur. Massaj kursi nafaqat mushaklaringiz va boʻgʻimlaringizni ogʻriqdan xalos qiladi, balki sizga dam olishga va kundalik hayotdagi katta-kichik tashvishlardan biroz boʻlsa ham chalgʻishga yordam beradi. Ruhiy va jismoniy sogʻligʻingizga gʻamxoʻrlik qilish kelgusidagi faoliyatingizga ham ijobiy taʼsir qiladi.

Sayohatga chiqing

Sayohatning afzalliklari, uning qanchalik ajoyib ekanligi haqida koʻpchilik allaqachon biladi. Agar moliyaviy ahvolingiz uzoq safarga chiqishga imkon bermasa, muqobil yoʻlni oʻylab koʻring. Doʻstingizning yozgi uyiga tashrif buyurish, boshqa viloyat yoki shahardagi qarindoshlarnikiga borish, togʻ yonbagʻirlarda oilaviy piknik tashkil qilish – bularning barchasi katta mablagʻ talab qilmaydigan sayohat turlariga kiradi. Ular sizga eng muhim narsalarni – yangi his-tuygʻu va taassurotlar, doʻstlar bilan uchrashuv va maroqli dam olish imkoniyatini beradi.

Madaniy tadbirlarga boring

Madaniy tadbirlarda tez-tez qatnashsangiz yaxshi, albatta. Biroq vaqt tigʻizligi tufayli ilojingiz boʻlmasa, yilda kamida bu uchun bir kuningizni ajrating.  Muzeylarga, turli koʻrgazmalarga, spektakl tomosha qilish uchun boring, sevimli xonandangizning konsertiga tashrif buyuring yoki stadion tribunalarida sevimli jamoangizni qoʻllab-quvvatlang. Bu hayotga, yashashga boʻlgan qiziqishingizni yanada oshiradi.

• Foydali
• Lifestyle
• qiziqarli