O‘zbekistonda oliygohlarni davlat granti asosida tamomlagan bitiruvchilar uchun belgilangan kamida uch yil ishlab berish talabi bekor qilinishi mumkin. Bu bo‘yicha “Kadrlarni davlat grantlari asosida maqsadli tayyorlash tartibi to‘g‘risida nizomni tasdiqlash haqida”gi qarorga o‘zgartirish kiritish taklifi jamoatchilik muhokamasiga qo‘yildi. 

Amaldagi qaror bilan 2005-yildan beri davlat granti asosida bakalavriat va magistraturaga qabul qilinganlarga kamida uch yil ishlab berish sharti qo‘yib kelinadi.

Taklifga ko‘ra, mazkur talabni bekor qilish nazarda tutilmoqda. Uning o‘rniga bitiruvchining ishlab berish muddati ta’lim yo‘nalishi xususiyatidan kelib chiqib, Oliy ta’lim, fan va innovatsiyalar vazirligi tomonidan alohida belgilanishi qayd etilgan. Qarordagi “kamida uch yil” jumlasi o‘rniga “majburiy” so‘zini kiritish taklifi berilgan.

Shu bilan birga, bir necha bandlarga texnik o‘zgartishlar kiritish ham belgilanyapti. Masalan, bitiruvchilarni “doimiy yashash joyi” bo‘yicha ishga taqsimlash tartibi “yashash joyi” degan so‘zlar bilan almashtirilishi taklif qilingan. Qaror muhokamasi 26-martgacha davom etadi. Hujjat ma’qullansa, e’lon qilingan kundan boshlab rasman kuchga kiradi.

• Diplom
• Oliy ta'lim
• Yangilik