Dunyo yosh parlamentariylari Samarqandda jamlanadi.

4–6-sentyabr kunlari Samarqand shahrida Yosh parlament a’zolarining XII global konferensiyasi bo‘lib o‘tadi. Anjumanda 183 mamlakat va 15 ta xalqaro tashkilot vakillari, shuningdek, 50 ga yaqin doimiy kuzatuvchi - jami qariyb 300 nafar ishtirokchi qatnashishi kutilmoqda.

Xalqaro anjuman O‘zbekiston Oliy Majlisi Senati va Parlamentlararo ittifoq hamkorligida tashkil etiladi.

Mazkur konferensiyani O‘zbekistonda o‘tkazish tashabbusi 2025-yil 5–9-aprel kunlari Toshkentda bo‘lib o‘tgan Parlamentlararo ittifoqning 150-Assambleyasida ilgari surilgan.

Konferensiya «Murakkab davrda inson huquqlari, adolat va inson qadr-qimmatini tiklash yo‘lida» mavzusiga bag‘ishlanadi.

Tadbir ishtirokchilari orasida yosh parlament a’zolari, parlament rahbarlari va deputatlar, xalqaro tashkilotlar hamda fuqarolik jamiyati institutlari vakillari bo‘ladi.

Konferensiya davomida zamonaviy dunyodagi dolzarb muammolarni hal etishda yoshlarning o‘rni va ularning qaror qabul qilish jarayonlaridagi ishtirokini kengaytirish masalalari muhokama qilinadi.

Shuningdek, inson huquqlari va qadr-qimmatini ta’minlash, adolat tamoyillarini mustahkamlash, tinchlik va barqarorlikni ta’minlash hamda Barqaror rivojlanish maqsadlariga erishishda yoshlarning rolini oshirish bo‘yicha fikr va tajriba almashiladi.

Anjuman doirasida Barqaror rivojlanish maqsadlariga erishishda parlamentlararo hamkorlik masalalariga bag‘ishlangan III global forum ham o‘tkaziladi.