Filippinda bortida 350 dan ortiq odam bo‘lgan parom cho‘kib ketdi. Kamida 316 nafar yo‘lovchi qutqarilib, 15 kishi esa halok bo‘lgan. Bu haqda “Sinxua” agentligi xabar berdi.

Ma’lum qilinishicha, MV Trisha Kerstin 3 orollararo yuk va yo‘lovchi paromi bortida 332 yo‘lovchi hamda 27 ekipaj a’zosi bo‘lgan. U Zamboanga port shahridan Sulu provinsiyasidagi Jolo oroliga yo‘l olgan. Yarim tundan keyin, ehtimol, texnik nosozlik yuzaga kelib, parom Basilan provinsiyasi qirg‘oqlari yaqinida cho‘kib ketgan.

​Hodisa joyiga qirg‘oq qo‘riqlash xizmati va dengiz floti kemalari, kuzatuv samolyoti, Black Hawk havo kuchlari vertolyoti va qayiqlar jalb qilingan. Hozirda Basilan yaqinida qidiruv-qutqaruv ishlarini olib borilmoqda.

Parom nega cho‘kib ketgani hozircha noma’lum, holat yuzasidan tergov o‘tkaziladi. Tekshiruvdan o‘tgan paromda ortiqcha yuk yoki odam tashish holatlari aniqlanmagan.

Filippinda dengizdagi baxtsiz hodisalarning tez-tez uchrashiga kuchli bo‘ronlar, kemalarning texnik holati, ortiqcha yo‘lovchi tashish va xavfsizlik qoidalarining yetarlicha nazorat qilinmasligi sabab bo‘ladi.

• Filippin
• Halokat
• dengiz