Fransiyaning Montagne et Neige Développement (MND) kompaniyasi “Chimyon” umummavsumiy oromgohi qurish boʻyicha oʻtkazilgan ochiq tanlovda gʻolib boʻldi.

Endilikda mazkur kompaniya “Chimyon turistik zonasini qurish” loyihasi doirasida “Chimyon” umummavsumiy oromgohi obyektlarini loyihalash, tadqiq qilish, qurish, jihozlarni yetkazib berish va oʻrnatish, sozlash-ishga tushirish ishlarini olib boradi.

Qayd etilishicha, MND togʻli hududlarda loyihalarni amalga oshirish boʻyicha yetakchi sanoat guruhlaridan biridir. Bosh qarorgohi Fransiya janubidagi Savoya departamentining Sen-Hélène-dyu-Lak shahrida joylashgan. Guruh 2004-yildan buyon dunyoning 49 davlatida faoliyat yuritib kelmoqda.

Shuningdek, MND togʻli joylarda turizm sohasida umummavsumiy loyihalarni amalga oshirish hamda osma yoʻllaridan shaharlarda, sanoat obyektlarida va maishiy maqsadlarda foydalanish boʻyicha keng koʻlamli xizmatlar koʻrsatishda jahon yetakchilaridan biri hisoblanadi.

Bundan tashqari, kompaniya Kurchevel, Chamonix-Mon-Blanc, Rosa Xutor, Bosco Gurin, Moleson, Narvik va boshqalar kabi butun dunyo boʻylab 1 500 dan ortiq loyihalarni amalga oshirishda ishtirok etgan.

Maʼlum qilinishicha, Chimyondagi loyiha doirasida dam oluvchilarni 2 515 metr balandlikka koʻtariladigan gondol tipidagi 10 kishilik asosiy osma yoʻli (maksimal quvvati — 2000 kishi/soat) va 3309 metr balandlikka chiqadigan mayatnik tipidagi 80 kishilik oraliq osma yoʻli (maksimal sigʻimi — 800 kishi/soat) quriladi.

Kurort bunday inshootlarga ega boʻlgan Markaziy Osiyo mamlakatlaridagi eng baland nuqtaga aylanadi. Shuningdek, unda XXL Zip line, Alpine coaster, Adventure tower, Tubing, Via ferrata kabi 20 dan ortiq turdagi qishki va yozgi attraksionlar tashkil etiladi, umumiy uzunligi 20 km dan ortiq boʻlgan turli darajadagi 11 ta changʻi uchish joylari, 6000 nafar turistga moʻljallangan mehmonxona majmualari va kottejlar quriladi.

• Chimyon
• Fransiya
• Kurort