Kecha, 3-yanvar kuni Germaniya va Fransiya Tashqi ishlar vazirliklari rahbarlari Annalena Berbok va Jan-Noel Barro Yevropa Ittifoqi nomidan Suriyaga tashrif buyurdi.

Ular hokimiyatning amaldagi rahbari Ahmad al-Sharaa (Abu Muhammad al-Jo‘loniy), shuningdek, Suriya fuqarolik jamiyati vakillari bilan muzokaralar o‘tkazdi va Yevropa Ittifoqi Suriyada hokimiyatning tinch va inklyuziv tarzda o‘zgarishi tarafdori ekanini bildirdi. Berbok va Barro Bashar Asad rejimi qulagandan keyin Damashqqa tashrif buyurgan birinchi Yevropa tashqi siyosat idoralari rahbarlari bo‘ldi.

Ular Damashq yaqinida joylashgan Bashar Asad rejimining vahshiyliklari timsoliga aylangan Saydnaya qamoqxonasiga tashrif buyurdi. Ma’lumotlarga ko‘ra, hukumat almashganidan keyin 4000 dan ortiq mahbus ozod etilgan.

Damashqda so‘zlagan Barro “suveren, barqaror va tinch” Suriya davlati qurilishiga umid bildirgan. Berbok esa Germaniya Suriyaning “ishlayotgan davlat”ga aylanishiga yordam bermoqchi ekanligini ta’kidlagan. Suriyada hokimiyat tepasiga kelgan, “Al-Qoida”ning Suriyadagi bo‘limi bilan bog‘langan va ko‘plab davlatlar tomonidan terrorchi tashkilot sifatida tasniflangan “Hayat Tahrir ash-Shom” (HTSh) tashkilotiga nisbatan “shubhali qarashlarga” qaramay, Berbok Suriya xalqini ushbu muhim chorrahada qo‘llab-quvvatlash imkoniyatini boy bermaslik kerakligini aytgan. Uning so‘zlariga ko‘ra, Berlin “hokimiyatning inklyuziv va tinch yo‘l bilan o‘tkazilishini” hamda Suriyada fuqarolik yarashuvini qo‘llab-quvvatlashga tayyor.

Berbok Suriyaning yangi ma’muriyatini “aholi guruhlariga qarshi qasos olish harakatlari”, saylovlarni kechiktirish hamda sud va ta’lim tizimini “islomlashtirish” urinishlaridan qochishga chaqirdi.

• Germaniya
• Suriya
• TIV
• Yevropa Ittifoqi