Eron 22-oktabr kuni Hormuz bo‘g‘ozida yetti neft tankeri yonib ketgani yoki shikastlanganini ma’lum qildi. Hodisalarga Eron tomonidan berilgan zarbalar yoki dengiz minalari sabab bo‘lgani aytilmoqda. Bu haqda AP News xabar berdi.

Eron davlat televideniyesiga ko‘ra, Islom inqilobi qo‘riqchilari korpusi harbiy-dengiz kuchlari AQSH tijorat kemalarining bo‘g‘ozdan o‘tishiga yordam berish davom etsa, mintaqadagi Amerika harbiy bazalariga zarba berish bilan tahdid qilgan. Hodisalarda qurbonlar bor-yo‘qligi haqida ma’lumot berilmagan.

Buyuk Britaniyaning dengiz savdosi operatsiyalari monitoring xizmati (UKMTO) ma’lumotlariga ko‘ra, oktabr oyida tijorat kemalariga hujumlar soni mart oyidan beri eng yuqori darajaga yetgan. Biroq xizmat so‘nggi hodisalar bo‘yicha alohida hisobot e’lon qilmagan.

Eron tashqi ishlar vaziri Abbos Aroqchi 21-oktabr kuni mamlakat diplomatiyaga ochiqligini, shu bilan birga, o‘zini himoya qilishga tayyor ekanini bildirgan. Ayni paytda AQSH mintaqaga qo‘shimcha harbiy kuchlar, jumladan, uchinchi aviatashuvchi kema va minglab askarlarni yubormoqda.

Vositachilar Vashington va Tehronni muzokaralarga qaytarishga urinmoqda. Hormuz bo‘g‘ozidagi keskinlikning kuchayishi neft va boshqa muhim mahsulotlar yetkazib berilishiga ta’sir ko‘rsatishi hamda narxlar oshishiga olib kelishi mumkin.