2028-yilda Markaziy Osiyoda ilk bor nufuzli Xalqaro astronavtika kongressi (IAC) O‘zbekistonning Samarqand shahrida bo‘lib o‘tadi. Bu haqdagi qaror Avstraliyaning Sidney shahrida o‘tgan kongress davomida qabul qilingan. Bu haqida raqamli texnologiyalar vaziri Sherzod Shermatov o‘z sahifasida ma’lum qildi.

Vazirning aytishicha, O‘zbekiston Hindiston va Bahrayn kabi davlatlar bilan kuchli raqobatda g‘olib chiqishga erishgan. U, shuningdek, bu yutuqni “Prezidentimiz tashabbusi bilan boshlangan Uchinchi Renessans jarayonining xalqaro e’tirofi” sifatida baholagan.

Shermatov o‘z bayonotida shunday deydi:
“600 yil oldin Mirzo Ulug‘bek Samarqandda observatoriya va madrasa barpo etib, shaharni ilm-fan markaziga aylantirgan bo‘lsalar, 2028-yilda kosmik soha bo‘yicha dunyoning eng yirik anjumani aynan shu shaharda o‘tkazilishi tarixiy davomiylikni ko‘rsatmoqda”.

Tadbir doirasida xalqaro ko‘rgazmalar ham tashkil etilishi va 10 mingdan ortiq mehmon qatnashishi kutilmoqda. Shermatovning qayd etishicha, xuddi shunday kongress Avstraliyada o‘tkazilganda, mamlakat iqtisodiyotiga 27 million dollardan ortiq daromad keltirgan.

Shuningdek, bu kongress mezbonlik qilgan boshqa davlatlarga ham katta foyda keltirgan. Masalan, Birlashgan Arab Amirliklarida milliy kosmik ilm markazi tashkil etilgan, Avstraliyada kosmik agentlik ochilgan, Fransiya esa bu sohada global yetakchi sifatidagi mavqeini mustahkamlagan.

• AQSh
• Ilon_Mask