Bugun O‘zbekiston kasaba uyushmalari Federatsiyasi saroyida Jahon iqtisodiyoti va diplomatiya universiteti bitiruvchilariga diplom topshirish tantanali marosimi bo‘lib o‘tdi. Tadbir bitiruvchilar, professor-o‘qituvchilar, davlat idoralari vakillari hamda diplomatik korpus a’zolarini bir joyga jamladi.

Tantanali anjuman avvalida Oliy Majlis Senati Raisining birinchi o‘rinbosari, Jahon iqtisodiyoti va diplomatiya universiteti rektori Sodiq Safoyev bitiruvchilarni onlayn tarzda qutladi va kelgusida O‘zbekiston taraqqiyotiga munosib hissa qo‘shishlariga umid bildirdi. U, shuningdek, talabalarni butun o‘qish mobaynida qo‘llab-quvvatlagan ota-onalarga ham minnatdorlik izhor etdi.

O‘zbekiston tashqi ishlar vazirining birinchi o‘rinbosari Bahrom A’loyev bo‘lajak diplomatlar oldidagi nutqida, ular doimiy ravishda o‘z ustida ishlashi, bilimi, tajribasi va malakasini oshirishga intilishi, ishning innovatsion uslublarini joriy etishi kerakligini alohida urg‘uladi.

Shundan so‘ng universitetdagi yorqin hayot va talabalarning yutuqlariga bag‘ishlangan videorolik namoyish etildi.

Universitet bitiruvchilariga O‘zbekistonning xorijdagi diplomatik vakolatxonalari rahbarlari, shuningdek, xorijiy davlatlarning yurtimizdagi elchilari o‘z tabriklarini bildirdilar. Ular orasida Fransiya elchisi Oreliya Bushez, Chexiya elchisi Lyubomir Frebort hamda BMT va boshqa xorijiy tashkilotlar vakolatxonalari vakillari bor edi.

Yuqori o‘zlashtirish va faol jamoatchilik faoliyati bilan ajralib turgan 50 nafar bitiruvchiga alohida e’tibor qaratildi. Qolgan bitiruvchilarga Tashqi ishlar vazirligi va muassasa rahbariyati tomonidan diplom va sertifikatlar topshirildi.

Tadbir yurtimizning taniqli san’at ustalari va talabalari ishtirokidagi bayramona konsert bilan yakunlandi.

• Diplom
• Iqtisodiyot
• Jahon iqtisodiyoti va diplomatiya universiteti
• rektor