Belarus prezidenti Aleksandr Lukashenko mamlakatga mehnat migrantlarini jalb qilish tartibi va ularga qo‘yiladigan talablar haqida ma’lumot berdi. Uning aytishicha, bu masala O‘zbekiston prezidenti Shavkat Mirziyoyev bilan ham muhokama qilingan. Lukashenko Belarusning ayrim hududlarida ishchi kuchiga ehtiyoj yuqori ekanini ta’kidlab, o‘zbekistonlik mutaxassislarni ishga taklif qilish bo‘yicha tizim ishlab chiqilganini ma’lum qildi. Belarus rahbariga ko‘ra, dastlab nomzodlar elchixona orqali saralanadi, so‘ngra korxona rahbarlari o‘zlariga zarur mutaxassislarni tanlab oladi. Yaqin orada qariyb 200 nafar o‘zbekistonlik Vitebsk viloyatida ishlash uchun kelishi kutilmoqda.

Lukashenko migrantlarni mamlakat bo‘ylab ehtiyoj mavjud hududlarga taqsimlash, ularni uy-joy bilan ta’minlash va Belarus fuqarolari bilan teng huquqlar yaratish muhimligini qayd etdi. Shuningdek, u Belarus zarurat tug‘ilganda kelayotgan ishchilarni qo‘shimcha o‘qitish va malakasini oshirishga ham tayyor ekanini bildirdi. “Faqat kelinglar va ishlanglar”, dedi Belarus prezidenti.