O‘zbekistonlik UFC jangchisi Bogdan Guskov navbatdagi jangini yarim og‘ir vazn toifasining sobiq chempioni Magomed Ankalayevga qarshi o‘tkazadi. Bu haqda UFC ma’lum qildi.

Qayd etilishicha, amerikalik Xalil Rountri olgan jarohati sabab 25-iyul kuni Abu-Dabidagi Etihad Arenada bo‘lib o‘tadigan UFC Fight Night turnirining markaziy jangida ishtirok eta olmaydi. Uning o‘rnini Bogdan Guskov egallaydi.

Ma’lumot uchun, Guskov faoliyati davomida 18 ta g‘alabaga erishgan bo‘lib, ularning barchasini muddatidan oldin yakunlagan. Shundan 13 tasi birinchi raunddayoq qo‘lga kiritilgan.

UFC reytingida Magomed Ankalayev yarim og‘ir vazn toifasida 1-o‘rinda, Bogdan Guskov esa 10-o‘rinni egallab turibdi.