Fransiyaning amaldagi prezidenti Emmanuel Makron Ukrainaga Sezar o‘ziyurar artilleriya moslamalarini yetkazib berishini aytdi. Bu haqda u jurnalistlarga fransuz qurollarining Ukrainaga yetarli darajada keng miqyosda yetkazib berilmagani haqidagi tanqidlarga javob sifatida gapirgan. 

“Kecha men Germaniya kansleri Olaf Shols bilan shu mavzuda gaplashdim. Biz Ukrainaga Milan raketa tizimidan tortib Sezar artilleriya moslamalarigacha katta miqdorda qurol-yarog‘ yetkazib berishda davom etamiz”, – deya tushuntirgan Makron.

Qayd etish joiz, Fransiyadagi prezidentlik saylovlarida Makronning asosiy raqibi Marin Le Pen mojaroni hal qilish uchun Ukraina qurolli kuchlariga qurol yetkazib berish samarasiz ekani haqida bir necha bor gapirgan.

Ma’lumot uchun, Fransiya mart oyi boshida Ukrainaga mudofaa qurollari, materiallar va dori-darmonlarni yetkazib berishni boshlagan. O‘shandan beri u Kiyevga 100 million yevrolik harbiy yordam yuborgan. Umuman olganda, aprel oyi o‘rtalarida Ukrainaga harbiy yordam ko‘rsatish uchun Yevropa Ittifoqining umumiy mudofaa fondi 1,5 milliard yevroga baholangan.

• Artilleriya
• Fransiya
• Jahon
• Ukraina
• Urush