Markaziy bank tijorat banklari va to‘lov tizimlari operatorlariga bankomatlar bilan bog‘liq muammolarni tezkor hal qilish bo‘yicha qator ko‘rsatmalar berdi.

Qayd etilishicha, bank kartasidan pul yechilgani holda naqd mablag‘ berilmasligi, mablag‘larning kech qaytarilishi yoki muvaffaqiyatsiz amaliyot uchun komissiya ushlab qolinishiga jiddiy masala sifatida qaralishi kerak.

Shuningdek, mijozlarni murojaat holati haqida o‘z vaqtida xabardor qilmaslik va mas’uliyatni bir tashkilotdan boshqasiga o‘tkazish holatlari tanqid qilindi.

Markaziy bank bankomatlarda yuzaga keladigan nosozliklarni tezkor bartaraf etish, mablag‘larni proaktiv tarzda qaytarish, eskirgan uskunalarni almashtirish hamda xizmat sifatini oshirish bo‘yicha tavsiyalar berdi.

Ma’lumotlarga ko‘ra, 2026-yil boshida O‘zbekistonda 40 mingdan ortiq bankomat va infokiosk faoliyat yuritmoqda.