Samarqand shahri va Namangan viloyatida fuqarolarni umra ziyoratiga yuborishni va’da qilib, ulardan pul talab qilgan ikki shaxs ushlandi. Bu haqda Davlat xavfsizlik xizmati (DXX) ma’lum qildi.

DXX ma’lumotiga ko‘ra, Samarqandda faoliyat yurituvchi oilaviy korxona vakili bir fuqaro va uning ikki nafar qarindoshini Saudiya Arabistoniga umra ziyoratiga yuborishni va’da qilgan. U safarni tashkil etish va diniy amallarni ado etish uchun sharoit yaratib berish evaziga 3 450 dollar talab qilgan. Tezkor tadbir davomida u talab qilingan mablag‘ning 3 ming dollarini olayotgan vaqtda qo‘lga olingan.

Shunga o‘xshash holat Namangan viloyatida ham aniqlangan. Namangan tumanida faoliyat yurituvchi mas’uliyati cheklangan jamiyat rahbari Uchqo‘rg‘on tumanida yashovchi fuqaroni umra ziyoratiga yuborishni va’da qilib, undan 1 350 dollar so‘ragan. U oldindan 1 200 dollar olayotgan vaqtda ushlangan.

Samarqanddagi holat yuzasidan jinoyat ishi qo‘zg‘atilib, dastlabki tergov harakatlari olib borilmoqda. Namangandagi holat bo‘yicha esa tergovga qadar tekshiruv ishlari davom etmoqda.