O‘zbekistonda 2026-yil davomida reklama va tashqi yozuvlarning davlat tili talablariga muvofiqligi bo‘yicha o‘tkazilgan monitoringlarda 4 496 ta kamchilik aniqlangan. Bu haqda Raqobat qo‘mitasi ma’lum qildi.

Qo‘mita ma’lumotiga ko‘ra, respublika bo‘ylab peshlavhalar, tashqi reklama, e’lonlar va axborot matnlari yuzasidan jami 16 057 ta monitoring o‘tkazilgan.

Aniqlangan kamchiliklarning 2 344 tasi peshlavha, tashqi yozuv va e’lonlarning, 975 tasi esa tashqi reklama matnlarining boshqa tillarda berilgani bilan bog‘liq. Shuningdek, 841 ta peshlavha va e’londa hamda 336 ta tashqi reklama vositasida imloviy xatolar va so‘zlarning lug‘aviy ma’nosi buzilishi holatlari qayd etilgan.

Raqobat qo‘mitasi aniqlangan kamchiliklarni bartaraf etish choralari ko‘rilgani va reklama hamda tashqi yozuvlarning qonunchilik talablariga muvofiqligi ta’minlanganini bildirdi. Shuningdek, tadbirkorlarga davlat tili va reklama to‘g‘risidagi qonunchilik talablariga rioya etish yuzasidan tushuntirishlar berilgan.