Rossiya Xavfsizlik kengashi raisi o‘rinbosari va sobiq mamlakat prezidenti Dmitriy Medvedev “VKontakte” ijtimoiy tarmog‘ida post yozib, Qozog‘iston va Gruziya Rossiya imperiyasi sharofati bilan hozirda mavjud ekanini ta’kidladi. Jurnalist va siyosatchi Kseniya Sobchak fikricha, Medvedevning akkaunti xakerlar hujumiga uchragan, chunki post bir necha daqiqadan keyin o‘chirib tashlangan.

Medvedev bu postni rostdan yozganmi yoki uning sahifasini buzishganmi, noma’lum. Rossiya Federasiyasi Xavfsizlik Kengashi rahbari o‘rinbosari bu haqda hozircha izoh bermagan.

Shunday bo‘lishiga qaramay, ko‘pchilik postni skrinshot qilib olishga ulgurdi. Unda aytilishicha, Gruziya Rossiya Imperiyasi sharofati bilan hozirgi chegaralariga ega bo‘lgan. U Rossiya imperiyasiga kirguniga qadar umuman mavjud bo‘lmagan, deb hisoblaydi siyosatchi.

Shuningdek, Medvedovning postida yozilishicha, qachonlardir katta va qudratli Sovet ittifoqi tarkibida bo‘lgan barcha xalqlar yana ruslar boshchiligida birgalikda ahil yashashadi. Buning uchun Rossiya qo‘lidan kelgan barcha ishni qilishga tayyor.

“90-yillarning boshlarida sodir etilgan halokatli xato tuzatilishiga, endi hech qachon suverenitet paradlari bo‘lmasligiga va bir vaqtlar buyuk va qudratli Sovet Ittifoqida yashagan barcha xalqlar yana ruslar boshchiligida birgalikda ahil yashashiga hech kim shubha qilmasligi kerak. Buning uchun esa na kuchimizni, na vositalarimizni ayamaymiz. Va biz allaqachon bu yo‘lda harakat qilishni boshladik”– deyiladi postda.

Siyosatchiga ko‘ra, Kiyev egallangach, Rossiya o‘zining yangi kampaniyasini boshlaydi va mamlakat avvalgidek hech qayerda tugamaydigan chegaralarini qaytarib oladi.

“Kiyev va Kichik Rossiyaning barcha hududlari ular tomonidan o‘ylab topilgan ukrainchilikni targ‘ib qiluvchi “millatchilar to‘dalari”dan ozod qilingandan so‘ng, Rossiya yana ming yil avval Eski Rossiya davlati davridagidek birlashgan, qudratli va yengilmas bo‘lib qoladi. Shundan so‘ng, biz Moskvaning yagona qo‘li ostida, slavyan xalqi boshchiligida, siz bilganingizdek, hech qayerda tugamaydigan Vatanimiz chegaralarini tiklash bo‘yicha navbatdagi kampaniyaga boramiz. Bizdan tortib olingan barcha yerlar ajdodlar qoni bilan sug‘orilgan va asrlar davomida ko‘plab janglarda zabt etilgan. Va biz ularni hech kimga bermaymiz”,– deb yoziladi Medvedovning postida.

Unga ko‘ra Gruziya Rossiya tarkibiga kirishdan oldin umuman mavjud bo‘lmagan. Hozirgi chegaralariga esa, faqat Rossiya imperiyasi doirasida erishgan.

“Masalan, Gruziya qoʻshib olinishidan oldin u umuman yoʻq edi. 1801-yilga kelib, hozirgi Gruziya hududi beshta suveren siyosiy sub’ektdan iborat edi holos. U Rossiya sharofati bilan hozirgi chegaralariga ega bo‘ldi”,– deyiladi uning postida.

Medvedovning sahifasiga joylashtirilgan postga ko‘ra, Gruziya Rossiyaga yaqinlashdi, “chunki u Moskva go‘yoki musulmon davlatlari o‘rtasida “dushmanlik muhiti”da o‘zining yagona ittifoqchisi ekanini tushungan. Hozir esa xuddi shu voqea takrorlanmoqda. Shimoliy va Janubiy Osetiya, Abxaziya va Gruziyaning qolgan hududi faqat Rossiya bilan yagona davlatning bir qismi sifatida birlashtirilishi mumkin”.

Ya’na u postining oxirida Qozog‘iston haqida ham to‘xtalib o‘tgan va uni sun’iy davlat deb atagan.

“Tarixdan yana bir misol, XVII asr boshlarida Shimoliy Qozog‘istonning yovvoyi yerlarida ruslar birinchi aholi punktlariga asos solgan. Uch asr davomida bu hududni ruslar tomonidan mustamlaka qilish jarayoni davom etdi, buning uchun Sibir temir yo‘lining ochilishi va Stolypin agrar islohoti alohida turtki bo‘ldi. Sovet Ittifoqi parchalanishidan oldin Shimoliy Qozog‘iston aholisining 62,5 foizi slavyanlar edi. Qozog‘iston sun’iy davlat, sobiq Rossiya hududlari, masalan, Guryev, Semipalatinsk, hatto Olma-Ota shaharlari 1924-yilgacha Verniy deb nomlangan. Joriy asrda Qozog‘iston hukumati ruslarning genotsidi sifatida baholanishi mumkin bo‘lgan turli etnik guruhlarni respublikaga joylashtirish bo‘yicha tashabbuslarni amalga oshira boshladi. Biz esa bunga ko‘z yummoqchi emasmiz. Ruslar u yerga kelmaguncha, tartib bo‘lmaydi”– deb tugallangan post.

• Gruziya
• Medvedev
• Qozog‘iston
• Rossiya
• SSSR