O‘zbekiston va Ozarbayjon fuqarolarining pensiya huquqlarini ta’minlashga qaratilgan yangi kelishuv imzolandi. Unga ko‘ra, ikki davlat hududida mehnat qilgan fuqarolarning ish staji pensiya tayinlashda o‘zaro hisobga olinadi.

Mazkur bitim 23 avgust kuni Toshkentda O‘zbekiston Prezidenti Shavkat Mirziyoyev va Ozarbayjon Prezidenti Ilhom Aliyev o‘rtasidagi muzokaralar yakunida imzolangan hujjatlar qatoridan joy oldi.

Yangi tartib, avvalo, ikki davlatda mehnat faoliyatini olib borgan fuqarolarning pensiya olish huquqini aniqlashda qulaylik yaratadi. Agar fuqaroning bir mamlakatdagi ish staji pensiya tayinlash uchun yetarli bo‘lmasa, ikkinchi davlatda to‘plangan tegishli ish staji ham hisobga olinadi.

Bunda har bir davlat fuqaroning o‘z hududida orttirgan ish stajiga mos ravishda pensiyaning tegishli qismini tayinlaydi va hisoblab chiqadi.

Kelishuvda fuqarolarning boshqa mamlakatga ko‘chib o‘tishi ham nazarda tutilgan. Ya’ni, shaxs boshqa davlat yoki uchinchi mamlakatga ko‘chgan taqdirda ham, unga avval tayinlangan pensiya kamaytirilmaydi, to‘xtatilmaydi yoki bekor qilinmaydi.

Shuningdek, fuqaro o‘z xohishiga ko‘ra pensiyasini uni tayinlagan davlat hududida olishni davom ettirishi yoki to‘lovlarni ikkinchi davlatga o‘tkazishni so‘rashi mumkin.

Pensiya tayinlash, qayta hisoblash yoki to‘lovlarni amalga oshirish bilan bog‘liq murojaatlarni fuqaro yashayotgan davlatdagi vakolatli tashkilotga topshirishi mumkin. Zarur holatlarda murojaat ikkinchi davlatga berilgan deb ham hisoblanadi.

Ikki mamlakatning vakolatli idoralari pensiya tayinlash va to‘lash uchun zarur bo‘lgan ma’lumot hamda hujjatlarni o‘zaro almashadi. Bu fuqarolarning turli idoralarga qayta-qayta murojaat qilish zaruratini kamaytirib, jarayonni soddalashtirishga xizmat qiladi.

Kelishuv hozircha imzolanishi bilan darhol kuchga kirmaydi. Uning amal qilishi uchun tegishli tartib-taomillar yakunlanishi kerak. Bitimni amaliyotga joriy etishning tashkiliy va texnik jihatlari esa alohida Ma’muriy kelishuv asosida belgilanadi.