Ogʻiz boʻshligʻidan kelayotgan noxush hidni haqiqiy muammo desa boʻladi. U birinchi uchrashuv, muhim masala boʻyicha koʻrishish va hattoki, ishga kirish uchun boʻlib oʻtadigan suhbatni ham chippakka chiqarishi mumkin. Koʻpincha ushbu muammo gigiyena qoidalariga rioya qilinmagan holdagina roʻy berishi kuzatiladi. Ogʻiz boʻshligʻida uchraydigan noxush hid tibbiyot tilida “holitoz” deb nomlanadi. Quyida ushbu kasallikning oldini olish va uni bartaraf etish boʻyicha foydali maslahatlar bilan tanishib chiqishingiz mumkin.

Noxush hid oʻzingizga seziladimi?

Ogʻizdan kelayotgan noxush hid insonning oʻziga emas, balki atrofdagilarga sezilishi mumkin. Hidning qandayligi, bor yoki yoʻqligini quyidagi usullar orqali tekshirib koʻrish mumkin.

1. Choyqoshiq yoki nam sochiq bilan til soʻlagidan oz miqdorda oling va taxminan 40 soniya namlik qurishini kuting, soʻngra hidlang.
2. Tish oralaridan ham ip yordamida soʻlak olib, takrorlang.
3. Qoʻlingizni yalang va 40 soniyadan soʻng hidlang.
Agar natija salbiy boʻlsa, muammoni uy sharoitida bartaraf etishga urinib koʻring.

Ishni tish pastasi tanlashdan boshlang

Olimlarning aniqlashicha, tarkibida vodorod peroksid kristal moddasi boʻlgan tish pastalari nafas yoʻlini tozalaydi. Shuningdek, noxush hid keltirib chiqarayotgan soʻlaklarni davolashda samarali vosita hisoblanadi.

Tishlaringizni toʻgʻri yuving

Buning uchun kun davomida kamida ikki marotaba (ertalab va kechki payt) tishingizni yuvish uchun uch daqiqa vaqt ajratishingiz zarur. Tish choʻtkasi 45 daraja burchak ostida joylashtirilgan boʻlishi kerak. Avval old, soʻngra orqa qismdagi tishlaringizni yuvishga odatlaning. Choʻtka yordamida tish ustidagi soʻlaklarni yoʻqotish uchun pastki tishlarni pastdan yuqoriga, yuqoridagilarini esa aksincha yuvish kerak. Shuningdek, orqa qismdagi chaynovchi tishlarni aylana harakat bilan tozalash maqsadga muvofiq.

Tilingizni ham tozalang

Tilda ham sezilishi qiyin boʻlgan soʻlak qoplamasi mavjud. Buning uchun maxsus til tozalovchi kurakcha, choʻtkaning orqa qismi yoki qoshiqchadan foydalansangiz boʻladi. Asosan, bakteriyalar toʻplanadigan tilning ildiz qismiga eʼtibor bering. Bu aynan noxush hidning makonidir. Tushungan boʻlsangiz, til ana shu bakteriyalardan xalos boʻlsa, noqulaylik keltirib chiqarayotgan hid ham oʻz-oʻzidan yoʻqola boradi.

Bundan tashqari, tanovuldan soʻng tishlar orasida qolgan ovqat qoldiqlari ham noxush hid keltirib chiqaradi. Bu holatda tish tozalovchi maxsus ipning yalpiz hidligidan foydalanganingiz maʼqul. Shuningdek, bu vosita milklar qonab ketishini ham kamaytiradi.

Ogʻiz irrigatoridan foydalaning

Ushbu tibbiy qurilma ogʻiz boʻshligʻi tozaligini saqlash uchun moʻljallangan. Sunʼiy tish foydalanuvchilarining fikriga koʻra, irrigator moslamasi yordamchi vositalarning biridir. Qurilma yordamida tozalash qiyin boʻlgan tishlarni ham oziq-ovqat qoldiqlaridan butkul qutqarish mumkin.

Ogʻzingizni chaying

Jarayon oxirida ogʻiz boʻshligʻini yaxshilab chaying. Buning uchun maxsus antiseptik suyuqliklar mavjud. Ular bakteriyalarni oʻldiradi va uzoq vaqt mobaynida ular keltirib chiqaradigan muammodan xalos boʻlasiz.

Sarimsoq va piyoz hididan qanday xalos boʻlish mumkin?

Buning uchun sarimsoq va piyozni hid kesuvchi boshqa mahsulotlar bilan tanovul qilish tavsiya etiladi. Bular – olma, yalpiz va salat bargi. Agar ular xom isteʼmol qilingudek boʻlsa, yanada taʼsir kuchi ortadi. Bu nafaqat xalq tabobati, balki ilmiy tomondan ham isbotlangan usul. Ularning tarkibidagi moddalar ogʻiz boʻshligʻida saqlanib qoluvchi hidlarni yoʻqotishga qodir.

Spirtli ichimlik hididan qanday qutulish mumkin?

Spirtli ichimlik hidi ogʻiz boʻshligʻi, qiziloʻngach hamda oshqozondagi qoldiqlar hisobiga saqlanib qoladi. Buni bartaraf etish uchun:
— ogʻzingizni chaying;
— saqich chaynang;
— tabiiy qahva iching.

Ammo tamaki hidini bartaraf etishda kurashish biroz farq qiladi. Buning uchun:

— peshob haydash uchun koʻproq suyuqlik ichish kerak. Bu orqali toksinlar tezroq organizmdan chiqib ketadi.
— issiq dush qabul qilish kerak, bu bilan teridagi mayda teshikchalar ochilib, modda almashinuvi faollashadi.
— modda almashinuvini tezlashtirish uchun ishtahani ochuvchi xushtaʼm yoki achchiqroq mahsulot isteʼmol qilish kerak.

Qanday qilib noxush hiddan butunlay qutulish mumkin?

Holitozdan umumiy va butunlay davolanish uchun maxsus dori vositasi yoʻq, afsuski. Ammo siz tish shifokorining nazoratidan muntazam oʻtib borsangiz, maʼlum muddat bu muammo haqida unutishingiz mumkin. Tish choʻtkasining imkoniyati yetmagan joylar, yaʼni yaxshi tozalanmay qolgan tishlar tufayli turli xil kasalliklar – kariyes, pulpit, parodontoz paydo boʻladi. Agar ularni davolamoqchi boʻlsangiz, tishlaringizni yetarlicha tozalang.

Gigiyenaga amal qilish foyda bermasa nima qilish kerak?

U holda shifokor koʻrigidan oʻting. Muammo nimada ekanligini otolaringolog, endokrinolog va gastroenterolog aniqlab beradi. Buning uchun ularning har biri alohida davolash kursini tayinlaydi. Sababi, noxush hid keltirib chiqaradigan kasalliklar mavjud.

Bular:

Surunkali tonzillit. Bu bodomsimon bezlarda “tiqin” paydo qiladi. Aynan shu yerda bakteriyalar yigʻilishni boshlaydi. Albatta, LORning yordami bilan bodomsimon bezning yalligʻlanishidan xalos boʻlasiz.

Qandli diabet. Nafaqat hid, balki chanqoq va ogʻizdagi quruqlik ham kasallikdan darak beradi. Endokrinolog yordami bilan kasallik belgilarini kamaytirish mumkin.

Gastrit kasalligida asosan ovqatlanishni toʻgʻri yoʻlga qoʻyish kerak. Ushbu savollar uchun gastroenterologga murojaat qilgan afzal.

Helicobacter pylori – oshqozon yarasini keltirib chiqaruvchi bakteriya. Bunda infeksiya soʻlaklar orqali yuqish mumkin. Shuning uchun ham bunday kasallar bilan bir idishdan ovqat tanovul qilish hamda oʻpishish mumkin emas. Bakteriya tananing ichida rivojlanadi va holitoz buning belgilaridan biridir. Albatta, mutaxassislar yordamida ushbu kasallikka davo topishingiz mumkin.

• Foydali
• qiziqarli
• salomatlik