“Ohangaronsement” sement zavodining asosiy aksionerlari bo‘lgan Lamaka Enterprises Limited hamda Giacinttar Limited o‘z aksiyalarini sotuvga qo‘ydi.

“Toshkent” Respublika fond birjasiga joriy yilning 13-yanvar kuni joylashtirilgan eʼlonga ko‘ra, Kiprdagi Lamaka Enterprises Limited kompaniyasi umumiy qiymati 1,61 trillion so‘m bo‘lgan 4,14 million dona aksiyasini (zavod umumiy aksiyasining 84,23 foizi) sotadi (1 dona aksiya 390 ming so‘mdan).

Kompaniya zavodning mazkur aksiyalar paketini 2021-yil 25-mayda imzolangan bitim asosida 557,68 milliard so‘mga sotib olgan edi.

Shuningdek, Britaniya Virgin orollaridan bo‘lgan Giacinttar Limited kompaniyasi ham o‘zi egalik qiladigan 694,9 ming dona (14,1 foiz) aksiyalarini 271 milliard so‘mga sotishni rejalashtirgan (1 dona aksiya 390 ming so‘mdan).

Ikkala kompaniya tomonidan sotuvga qo‘yilgan aksiyalar paketi zavod aksiyalarining 98,36 foizini tashkil qilib, jami 1,88 trillion so‘mga baholanmoqda.

Eslatib o‘tamiz, avvalroq rossiyalik oligarx Alisher Usmanovga tegishli bo‘lgan USM Holding‘ning tarmoq kompaniyalaridan biri USM Cement‘ga tegishli Akkermann Cement CA kompaniyasi “Ohangaronsement” AJning afillangan shaxslari ro‘yxatiga kiritilgani to‘g‘risida maʼlum qilingan edi.

Shuningdek, Akkermann Cement CA MCHJ rahbari hisoblangan Usolsev Yuriy Aleksandrovich “Ohangaronsement” AJ bosh direktori etib tayinlangani aytilgan edi.

• Alisher Usmonov
• Ohangaronsement