OITSga chalingan kimsalar kasallikni boshqalarga yuqtirish uchun o‘rindiqlarga tibbiy igna qo‘yib ketayotgani haqidagi xabarlar yolg‘on bo‘lib chiqdi. Toshkent shahar IIBB tomonidan o‘tkazilgan surishtiruvlar natijasida bu haqda video tayyorlagan va tarqatgan yigitlar aniqlandi.

Videoda go‘yoki kimlardir yuqumli kasalliklarni boshqa fuqarolarga ataylab yuqtirish maqsadida foydalanilgan tibbiy ignani o‘rindiqlarga joylashtirgani, bilmay o‘tirib olganlar zarar ko‘rayotgani aytilgan.

“O‘rtog‘im mana shunaqa “SPID” haqida video olaylik dedi. Bunaqa ommaga chiqib ketishini bilmagandim. Qilgan ishimdan pushaymonman, butun xalqdan uzr so‘rayman”, degan videoni tayyorlagan yigitlardan biri.

“Instagram ko‘rib bir g‘oya kelib qoldi. Biz ham shu videoni takrorlamoqchi bo‘ldik. “Skameyka”ga shpris qo‘yib ketilgani haqida — keyin shu videoni oldik. “Prosmotr” va layk uchun qilgandim, kontent uchun. Qilgan ishimdan afsusdaman, xalqdan uzr so‘rayman”, degan ikkinchisi.

O‘zbekistonda kasallikni shu yo‘l orqali yuqtirish holatlari uchraganmi?

Toshkent shahar OITSga qarshi kurashish markazi bo‘lim mudiri Anvarbek Jabborovning ta’kidlashicha, o‘rindiq, stul yoki odamlar o‘tiradigan boshqa joylarga kasallangan shaxs tibbiy igna qo‘yib ketishi bilan bog‘liq birorta ham holat kuzatilmagan. Mabodo qandaydir qonli igna kirib ketishi kabi holatlar sodir bo‘lsa, fuqaro 2 soatdan 72 soatgacha OITS markaziga murojaat qilish lozimligini, OIV infeksiyasi yuqmasligi 100 foiz oldi olinishini bildirdi.

“Virus o‘zi tashqi muhitga chidamsiz hisoblanadi. Ultrabinafsha nurlarida, ochiq havoda ikki soatdan uch, besh soat ichida virus o‘z tiriklik qobiliyatini, ya’ni yuqish qobiliyatini yo‘qotadi”, – deydi Anvarbek Jabborov.

Videoni tayyorlab tarqatgan ikki yigitga nisbatan Ma’muriy javobgarlik to‘g‘risidagi kodeksning 202-2-moddasi, ya’ni yolg‘on axborot tarqatish bilan hujjatlar rasmiylashtirilib, jinoyat ishlari bo‘yicha Mirzo Ulug‘bek tuman sudiga yuborilgan.

Ushbu moddaga ko‘ra, internetda yolg‘on axborotni tarqatish tarqatish, bazaviy hisoblash miqdorining 50 baravaridan 100 baravarigacha (20,6 mln so‘mdan 41,2 mln so‘mgacha ) miqdorda jarima solishga sabab bo‘ladi.

• OITS
• Videokontent