«O‘zbekiston temir yo‘llari» 2026-yilning birinchi yarmida 1 trillion so‘m sof foyda oldi. Bu 2025-yilning mos davridagi 659 milliard so‘mga nisbatan 350 milliard so‘m yoki 53 foizga ko‘p.

Kompaniyaning moliyaviy hisobotiga ko‘ra, yanvar–iyun oylarida sof tushum 9 trillion 618 milliard so‘mni tashkil etgan. Bu o‘tgan yilning shu davridagi 7 trillion 425 milliard so‘mga nisbatan qariyb 30 foizga ko‘p.

Tushumning oshishiga yo‘lovchi tashish xizmatlari narxlarining ko‘tarilgani ham ta’sir qilgan. Xususan, 1-fevraldan «Sharq», «Nasaf» va «O‘zbekiston» poyezdlari, shuningdek, «Afrosiyob» elektropoyezdlari chiptalari narxi 15 foizga oshirilgan.

Foyda tushumdan tezroq o‘sgan

Hisobot davrida mahsulot va xizmatlar tannarxi 6 trillion 701 milliard so‘mni tashkil etgan. Bu o‘tgan yilga nisbatan 17 foizga yoki 974 milliard so‘mga ko‘p.

Shunga qaramay, tushum tannarxga nisbatan tezroq o‘sgani hisobiga yalpi foyda 2 trillion 917 milliard so‘mga yetgan. Bu bir yil avvalgiga nisbatan 72 foizga ko‘p.

Kompaniya davr xarajatlarini ham 18 foizga qisqartirib, ularni 1 trillion 66 milliard so‘mgacha tushirgan. Natijada asosiy faoliyatdan olingan foyda 2 trillion 399 milliard so‘mni tashkil etib, bir yil ichida ikki baravardan ko‘proq oshgan.

Aynan asosiy faoliyatdan olingan foydaning keskin o‘sishi kompaniyaning sof foydasi oshishida asosiy omillardan biri bo‘lgan.