Samarqand va Qashqadaryo viloyatlarida davlat tashkilotlari mansabdor shaxslari ishtirokidagi korrupsiya holatlariga chek qo‘yildi. Bu haqda Davlat xavfsizlik xizmati xabar berdi.

Ma’lum qilinishicha, Samarqand viloyatidagi “Urguttumangaz” gaz ta’minoti bo‘limining mansabdor xodimi hamda ushbu tashkilotning sobiq xodimi o‘zaro til biriktirib, mahalliy MCHJga qarashli ishlab chiqarish sexiga yangi tabiiy gaz taqsimlash uskunasini o‘rnatish uchun loyiha hujjatlarini rasmiylashtirish va texnik shart olib berish evaziga 2 ming AQSH dollari talab qilgan.

Tezkor tadbir davomida ular so‘ralgan pul mablag‘ini olgan vaqtida ashyoviy dalillar bilan qo‘lga olingan.

Yana bir holat Qashqadaryo viloyatida qayd etilgan. Kadastr agentligining tuman bo‘limlaridan biri boshlig‘i mahalliy fuqaroga issiqxona qurish uchun ajratilgan 50 sotix sug‘oriladigan yer maydonini boshqa shaxs nomiga kadastr hujjatlarini rasmiylashtirib berishni va’da qilib, buning evaziga 11,6 ming AQSH dollari olgan.

Biroq mansabdor shaxs o‘z va’dasini bajarmagan. U olgan mablag‘ hisobidan avval 49,7 million so‘mni qaytarib berayotgan vaqtida noqonuniy harakatlari fosh etilgan. Tergovga qadar tekshiruv davomida esa qolgan 89,5 million so‘mni ham jabrlanuvchiga qaytarib bergan.

Har ikki holat yuzasidan tegishli tartibda tergov harakatlari olib borilmoqda.