FIFA World Cup–2026 doirasida O‘zbekistonni xalqaro maydonda tanitishga qaratilgan axborot kampaniyasi 1,07 milliarddan ortiq ko‘rishni qayd etdi. Bu haqda Turizm qo‘mitasi xalqaro OAV, ijtimoiy tarmoqlar va internet qidiruvlari tahlili asosida ma’lum qildi. Qayd etilishicha, O‘zbekiston milliy terma jamoasi ishtirok etgan uchrashuvlar davomida mamlakat haqidagi xabarlar jahon ommaviy axborot vositalarida sezilarli darajada ko‘paygan. Shu bilan birga, internet foydalanuvchilarining O‘zbekiston bo‘yicha qidiruv faolligi ham keskin oshgan.

Eng yuqori o‘sish Kolumbiya va Portugaliya terma jamoalariga qarshi o‘yinlar vaqtida kuzatilgan. Google Trends ma’lumotlariga ko‘ra, so‘nggi haftalarda “Uzbekistan Colombia World Cup 2026” qidiruv so‘rovi 450 foizga, “Uzbekistan” so‘roviga qiziqish 40 foizga, “Tourism to Uzbekistan” mavzusidagi izlanishlar esa 10 foizga oshgan. Kampaniya davomida O‘zbekiston haqidagi materiallar dunyoning 3 mingdan ortiq ommaviy axborot vositalari va axborot platformalarida e’lon qilinib, foydalanuvchilar bilan 52 milliondan ortiq o‘zaro muloqot qayd etildi. Xabarlar BBC, ESPN, The Guardian, Fox News, Daily Mail, NDTV va boshqa nufuzli xalqaro nashrlarda ham chop etilgan.

Shuningdek, jahon chempionati o‘tkazilgan shaharlarda tashkil etilgan maxsus ko‘rgazma maydonlari va fan-zonalarda O‘zbekistonning madaniy merosi, milliy qadriyatlari hamda sayohat imkoniyatlari xorijlik muxlislarga namoyish etildi. Atlanta xalqaro aeroportida tashkil etilgan milliy pavilyon ham ushbu targ‘ibot ishlarining muhim qismi bo‘ldi. Qo‘mita ta’kidlashicha, FIFA World Cup–2026 tajribasi yirik xalqaro tadbirlar O‘zbekistonning xalqaro imijini mustahkamlash va xorijliklarning mamlakatga bo‘lgan qiziqishini oshirishda samarali platforma ekanini yana bir bor tasdiqladi.

• FIFA
• Futbol