“Elektron tijoratda kuryerlik xizmati faoliyatini amalga oshirish tartibi to‘g‘risida”gi nizom Adliya vazirligida davlat ro‘yxatidan o‘tkazildi. Mazkur nizom Vazirlar Mahkamasining 2024-yil 26-dekabrdagi “O‘zbekiston Respublikasida elektron tijorat sohasini yanada rivojlantirish chora-tadbirlari to‘g‘risida”gi qaroriga muvofiq ishlab chiqilgan.

Nizom elektron tijorat ishtirokchilari – sotuvchilar, xaridorlar, elektron tijorat operatorlari, yetkazib berish xizmati operatorlari va kuryerlar o‘rtasidagi munosabatlar shaffoflashuviga, xavfsiz, sifatli va standartlarga muvofiq yetkazib berish tizimini yo‘lga qo‘yishga hamda elektron tijoratda yetkazib berish xizmatlarini ko‘rsatishni huquqiy tartibga solishga qaratilgan.

Nizomga ko‘ra, kuryer tadbirkor hamda yetkazib berish xizmati operatorlari bilan mehnat shartnomasi va (yoki) fuqarolik-huquqiy shartnomalar asosida tovarlarni yetkazib beruvchi jismoniy shaxs, shu jumladan o‘zini o‘zi band qilgan shaxs hisoblanadi.

Yetkazib berish xizmati operatorlari va kuryerlar, shartnomada nazarda tutilgan bo‘lsa, xaridorlardan tovar va (yoki) yetkazib berish xizmatlari uchun to‘lovlarni qabul qilishga haqli.  Bunda, nazorat-kassa texnikasini majburiy qo‘llash yoki elektron yoxud qog‘oz shaklida chek (kvitansiya) taqdim etilishi lozim. Yetkazib berish xizmati shartlari va parametrlari (muddati, narxi, to‘lov usullari, yetkazib berish hududi) buyurtma rasmiylashtirilayotgan paytda xaridorga ma’lum qilinishi shart.

Oziq-ovqat mahsulotlarini yetkazib berishda transport vositalari va termokonteynerlarni toza hamda soz holatda bo‘lishi, muntazam yuvilishi va dezinfeksiya qilinishiga amal qilish lozim.

Kuryerga quyidagilarni amalga oshirishga yo‘l qo‘yilmaydi, jumladan:

– tovarning qadog‘ini o‘zboshimchalik bilan ochish;

– xaridorlarning shaxsiy ma’lumotlari va yetkazib berilayotgan tovar haqidagi ma’lumotlarni uchinchi shaxslarga oshkor qilish.

Yetkazib berish xizmatlari quyidagi talablarga javob berishi lozim:

– ishonchlilik: tovarni tashish vaqtida uning butligini, iste’mol xususiyatlari va tovar ko‘rinishi saqlanishini ta’minlash;

– o‘z vaqtida yetkazish: xaridor bilan kelishilgan muddat va yetkazib berish intervallariga rioya qilish.

Kutilgan yoki yuzaga kelgan kechikishlar haqida xaridor o‘z vaqtida xabardor qilinishi shart:

– xavfsizlik: tovar, xaridor va kuryer xavfsizligini ta’minlaydigan barcha me’yor va qoidalarga rioya qilish;

– axborot berish: xaridorga yetkazib berish holatini kuzatish imkoniyatini (texnikaviy imkoniyat mavjud bo‘lsa) hamda kuryer yetib kelishining taxminiy vaqti haqida axborot olish imkonini yaratish.

• Adliya
• Qaror
• Yangilik