O‘zbekistondagi ayrim tog‘ tizmalari, tog‘ va cho‘qqilar nomlari davlat tili qoida va me’yorlariga muvofiqlashtiriladi. Bu Vazirlar Mahkamasining 9-yanvardagi qarorida belgilangan.

Ro‘yxatdan Andijon, Buxoro, Jizzax, Namangan, Navoiy, Qashqadaryo, Samarqand, Surxondaryo va Toshkent viloyatlari hamda Qoraqalpog‘istonda joylashgan 121 ta cho‘qqi, tog‘ va tog‘ tizmalari o‘rin oldi.

Xususan, Qoraqalpog‘istondagi Karatau tog‘i Qoratov, Andijondagi Chilustun tog‘ tizmasi Qirqustun, Qashqadaryodagi Chakilikalan tog‘ tizmasi Katta Chaqil, Samarqanddagi Chalduktaran tog‘i Qirqqiz, Toshkent viloyatidagi Pskem tog‘ tizmasi Piskom, unda joylashgan Pingvin cho‘qqisi esa Temirtosh deb o‘zgartirilmoqda.

Normativ-huquqiy hujjatlar, xaritalar, ish yuritish hujjatlari va xizmat yozishmalarida ushbu qaror bilan tasdiqlangan nomlardan foydalanilishi belgilandi.

Ekologiya va iqlim o‘zgarishi milliy qo‘mitasi ikki oy muddatda tog‘ tizmalari, tog‘ va cho‘qqilar nomlarining davlat tili qoida va me’yorlariga muvofiqlashtirilishi, yangi nom berilishi munosabati bilan tegishli hujjatlar, xaritalar hamda ma’lumotlar bazalariga o‘zgartirishlar kiritadi.

Shuningdek, tog‘ tizmalari, tog‘ va cho‘qqilarda o‘rnatilgan peshlavhalar hamda axborot ko‘rsatkichlaridagi yozuvlarning davlat tili qoida va me’yorlariga muvofiq lotin yozuviga asoslangan o‘zbek alifbosida yozilishini ta’minlaydi.

• O‘zbekiston
• Tog‘