“O‘zbekiston elchixonasi tomonidan fuqarolar bilan o‘tkazilgan navbatdagi konsullik qabuli davomida Samarqand viloyatida tug‘ilgan fuqaro R.M. bilan muloqot o‘tkazildi”, – deb xabar qilmoqda “Dunyo” axborot agentligi.

Suhbat davomida R.M. 2023-yil aprel oyida Polsha Respublikasiga ishchi vizasi asosida vaqtinchalik mehnat faoliyatini amalga oshirish maqsadida kelganini ma’lum qiladi.

Hozirga qadar u og‘ir kasallikka chalingan bo‘lib, Polshadagi tibbiy muassasalardan birida davolangan.

Shu munosabat bilan fuqaro vatanga qaytish hamda O‘zbekistonda davolanishini tashkil etishda amaliy yordam ko‘rsatishni so‘rab murojaat qilgan.

Uning murojaatini inobatga olgan holda, O‘zbekiston Migratsiya agentligi bilan hamkorlikda amaliy choralar ko‘rilgan. Xususan, fuqaroning vatanga qaytishi uchun aviachipta xarid qilinib, uchishgacha bo‘lgan davrda vaqtinchalik yashash joyi bilan ta’minlangan.

Kecha, 11-mart kuni R.M. Varshava-Toshkent aviareysi bilan O‘zbekistonga uchib ketgan.

• Agentlik
• Migratsiya
• Moddiy yordam
• O‘zbekistonlik
• Polsha
• fuqaro