Qozog‘iston viloyatlarida bahorgi suv toshqinlari boshlanganidan beri oltinchi kundirki, armiya bo‘linmalari mahalliy aholini qutqarish, Favqulodda vaziyatlar vazirligi va mahalliy ijro hokimiyati qutqaruv xizmatlariga yordam ko‘rsatish bilan shug‘ullanmoqda, deya xabar beradi “Kazinform” agentligi Qozog‘iston Respublikasi Mudofaa vazirligiga tayanib.

Havo hujumidan mudofaa kuchlari va harbiy uchish maktabi ekipajlari keng ko‘lamli suv toshqinlari sodir bo‘lgan Aqto‘be viloyatidagi aholi punktlari va qishlash joylaridan qishloq aholisini evakuatsiya qilishni davom ettirmoqda.

Qarag‘andi viloyati Nura tumanining Nura, Mingbayev, Yegindi qishloqlarida “Astana” hududiy qo‘mondonligi harbiy qismlarining 144 nafar harbiy xizmatchisi suv toshqinlariga qarshi kurash tadbirlariga qo‘shildi.

8 dona maxsus avtomobil texnikasi ajratildi. Xodimlar Nura daryosi bo‘yida joylashgan aholi punktlari va Sortirovochnaya stansiyasidagi suv ombori atrofiga qum qoplari yotqizish va qirg‘oq o‘rnatish ishlarini olib bormoqda.

Aqmola viloyatining Aqko‘l shahrida harbiy xizmatchilar 1000 metrga yaqin oqova drenajini tozaladi.

Umuman olganda, 27-martdan 1-aprelgacha harbiy uchuvchilar 1851 kishini, jumladan, 557 nafar bolani evakuatsiya qildi va 30 tonnadan ortiq gumanitar yukni tashidi. 17 mingga yaqin qop tayyorlanib, yotqizildi.

200 tonna qum yetkazib berish uchun 97 ta yuk mashinalari safari amalga oshirildi. 1400 metrga yaqin oqova drenaji tozalandi.

• Evakuatsiya
• Qozog‘iston