Iqtisodiyot va moliya vazirligi norasmiy Telegram botlari orqali “Tashabbusli byudjet” jarayonlarida ovoz berish evaziga pul mukofotlari taklif etish holatlari keng tarqalib, turli bahs va munozaralarga sabab bo‘layotganiga munosabat bildirdi. Ma’lum qilinishicha, va’da qilingan mablag‘lar berilmayotgani bo‘yicha fuqarolar tomonidan Iqtisodiyot va moliya vazirligiga yuzlab murojaatlar kelib tushmoqda. Ushbu holatda uchinchi shaxslar loyihalarga ovoz to‘plash maqsadida pul mablag‘lari yoki moddiy qiymatliklar va’da qilgan holda fuqarolardan ovoz to‘plab, keyinchalik mukofotlarni bermasligi holatlari kuzatilmoqda.

“Mukofotlar uchun emas, o‘zgarishlar uchun ovoz bering. Shaxsiy ma’lumotlaringizni hech kimga taqdim etmang. Firibgarlar tuzog‘iga tushib qolmang”, – deya fuqarolarni ogohlikka chaqirdi vazirlik.

​“Tashabbusli byudjet” jarayonlarida ovoz berish faqatgina “Ochiq byudjet” axborot portali, portalning Android va iOS tizimlarida ishlovchi mobil ilovalari hamda Telegram’dagi rasmiy bot orqali amalga oshiriladi. Bunda, amaldagi tartibga ko‘ra, berilgan ovozlar uchun hech qanday to‘lov talab etilmasligi bilan bir qatorda hech qanday moddiy rag‘batlantirishlar ham nazarda tutilmagan. Eslatib o‘tamiz, 2026-yilgi 1-mavsumi doirasida 11-martdan boshlangan ovoz berish jarayonlari 20-mart soat 23:59 ga qadar davom etadi. Ushbu mavsum doirasida fuqarolar tomonidan jami 21 049 ta loyiha kelib tushgan bo‘lib, shulardan 17 390 tasi saralash bosqichidan ovoz berish bosqichiga o‘tkazildi.   

• Ogohlantirish
• Open budget
• Vazirlik