Toshkent shahrining Chilonzor tumanida narkokuryerlar faoliyatiga chek qo‘ygan profilaktika inspektori xizmatdagi jasorati uchun muddatidan oldin mayor unvoni bilan taqdirlandi. Bu haqda Jamoat xavfsizligi departamenti xabar berdi.

Ma’lum qilinishicha, hodisa “Xavfsiz va sog‘lom yurt” oyligi hamda hududlarda xavfsiz muhitni ta’minlashga qaratilgan tezkor-profilaktik tadbirlar doirasida sodir bo‘lgan. 13-mart kuni Xirmontepa mahallasi profilaktika inspektori, kapitan Laziz Abdukarimov ko‘chada shubhali harakatlanayotgan ikki nafar shaxsni tekshirish maqsadida to‘xtatgan.

Biroq gumonlanuvchilar xodimning qonuniy talabiga bo‘ysunmay qochishga uringan. Profilaktika inspektori ulardan birini quvib yetib, ushlagan. Xolislar ishtirokida tekshiruv o‘tkazilganda, uning yonidagi sumkadan 59 ta zip-paketga qadoqlangan 295 dona pregabalin kuchli ta’sir qiluvchi dori vositalari aniqlangan.

Tezkor surishtiruv davomida qo‘lga olingan shaxs mahalla hududidagi bir nechta joylarga ko‘mib qo‘ygan hamda geolokatsiya orqali belgilab ketgan dori vositalari ham aniqlanib, ashyoviy dalil sifatida olingan.

Jinoyat qidiruv bo‘limi xodimlari tomonidan olib borilgan tezkor tadbirlar natijasida gumonlanuvchining qochib ketgan sherigi ham Shayxontohur tumani hududida qo‘lga olingan. Uning yonidan ham tarqatish uchun tayyorlangan 35 dona kuchli ta’sir qiluvchi kapsula topilgan.

Kapitan Laziz Abdukarimovning xizmat vazifasini sidqidildan bajargani hamda murakkab vaziyatda qat’iyat bilan harakat qilgani inobatga olinib, ichki ishlar vaziri buyrug‘i bilan unga muddatidan oldin mayor maxsus unvoni berilgan.

• Chilonzor
• Toshkent