Rossiyada ota-ona qaramog‘isiz qolgan 11 nafar voyaga yetmagan o‘zbekistonlik bola O‘zbekistonga olib kelindi. Bu haqda Ijtimoiy himoya milliy agentligi xabar berdi.

Ma’lum qilinishicha, bolalar 29-mart kuni Toshkent xalqaro aeroportida kutib olingan. Ularni Rossiyadan O‘zbekistonga olib kelish jarayonida Ichki ishlar vazirligi va Sog‘liqni saqlash vazirligi xodimlari hamrohlik qilgan.

O‘zbekistonning Rossiyadagi elchixonasi tomonidan bolalarni vatanga qaytarish uchun zarur hujjatlarni tayyorlash va rasmiylashtirish ishlari amalga oshirilgan.

Bolalar vaqtincha Toshkent shahar IIBB huzuridagi Voyaga yetmaganlarga ijtimoiy-huquqiy yordam ko‘rsatish markaziga joylashtirilgan.

Shundan so‘ng ularning 4 nafari “Inson” ijtimoiy xizmatlar markazlari orqali o‘z oilalariga, yana 7 nafari esa vasiylik va homiylik belgilanib, yaqin qarindoshlariga topshirilishi rejalashtirilgan.

Bolalarga ijtimoiy yordam va zarur xizmatlar ular kelgusida yashaydigan hududlarda ham davom ettiriladi.