AQSh prezidenti Donald Tramp Saudiya Arabistonining valiahd shahzodasi Muhammad bin Salmon Ol Saudni Oq uyda qabul qildi.

“Bu 2018-yildan beri shahzodaning Qo‘shma Shtatlarga birinchi tashrifi bo‘lib, o‘sha yili Saudiya Arabistonining Istanbuldagi konsulligida The Washington Post jurnalisti Jamol Qoshiqchi o‘ldirilgan edi. AQSh maxsus xizmatlari ma’lumotlariga ko‘ra, ushbu qotillikni aynan shahzoda Muhammad bin Salmon buyurtma qilgan”, deya yozmoqda The Insider nashri.

Donald Tramp va Muhammad bin Salmon uchrashuvida o‘tkazilgan matbuot anjumanida jurnalistlardan biri Qoshiqchining o‘ldirilishi haqida savol berdi.

“U bu haqda hech narsa bilmaydi. Bizning mehmonimizni bunday savollar bilan bezovta qilishingiz shart emas”, — deya javob berdi AQSh prezidenti.

Bundan tashqari, Tramp AQSh Saudiyadan 600 mlrd dollarlik sarmoya kutayotganini aytdi. Shahzoda esa investitsiya paketini deyarli 1 trillion dollargacha oshirishga va’da berdi, bu miqdor qirollikning yillik yalpi ichki mahsulotiga teng.

Tramp shuningdek, Saudiya Arabistoniga F-35 qiruvchi samolyotlarini sotishga tayyorligini e’lon qildi. Bu bu qachon amalga oshirilishi va qancha samolyot yetkazib berilishi ochiqlanmadi.

• AQSh
• Investitsiya
• Muzokara
• Saudiya Arabistoni
• Tramp