Argentina terma jamoasidan ketganini e’lon qilgan Lionel Messiga jurnalist Veronika Brunati ta’sirli maqola orqali minnatdorlik bildirdi. U maqolasida 2014-yilda turmush o‘rtog‘i, jurnalist Xorxe “El Topo” Lopes halok bo‘lganidan keyin Messi unga qanday yordam taklif qilganini aytib berdi.

Lopes 2014-yilgi Jahon chempionati vaqtida Braziliyada politsiyadan qochayotgan jinoyatchilar boshqaruvidagi avtomobil taksini urib yuborishi oqibatida halok bo‘lgan.

Brunatining yozishicha, fojiadan keyin Messi uni “Barselona”ning Joan Gamper mashg‘ulot bazasiga taklif qilgan. Futbolchi jurnalistni quchoqlab, undan farzandlari uchun nima qila olishini so‘ragan.

Messi Brunatining ikki farzandi — Agus va Lusiyaning ismlarini eslab qolgani jurnalistda katta taassurot qoldirgan.

Brunati Messidan farzandlari bilan uchrashib, ularni yana kuldirishini so‘raganini esladi. Uning ta’kidlashicha, Messi keyinchalik ham oilasini qo‘llab-quvvatlashga tayyorligini bildirgan.

Jurnalist Messining insoniy qo‘llab-quvvatlashi unga og‘ir kunlarni yengib o‘tishda kuch va ilhom berganini ta’kidladi. Uning so‘zlariga ko‘ra, Messi ikki farzandi bilan yolg‘iz holda dunyo bo‘ylab sayohat qilib, Argentina terma jamoasi o‘yinlarini yoritishda davom etishiga ruhlantirgan.

“Messi tufayli mening hayotim yaxshiroq bo‘ldi. El Toponing hayoti ham, farzandlarimning hayoti ham. Chunki Messi — beqiyos baxt”, — deb yozdi Brunati.

Jurnalistning fikricha, Messining eng katta merosi sovrinlar va rekordlar emas, balki odamlarga ulashgan baxtidir.