Qadogʻiga “Shakarsiz” deb yozilgan mahsulotni xarid qilib, uning yordami bilan ozishga umid qilyapsizmi? Siz foydali deb biladigan, aslida esa semirishga sabab boʻladigan mahsulotlarni roʻyxati bilan tanishing.

Bitta yogurt tarkibida 3 choyqoshiq shakar bor

Yogurtlarning reklamasida ularni qanday soʻzlar bilan taʼriflashlaridan qatʼiy nazar doʻkonga kirgan vaqtingizda mahsulot qadogʻidagi maʼlumotlar, xususan tarkib bilan tanishib chiqishni unutmang. Odatda kichik idishcha tarkibida 3 choyqoshiq miqdorida shakar boʻladi.

Yaxshisi, tabiiy yogurt sotib olishga harakat qiling. Bunday yogurtlar tarkibida shakar ham, murabbo va boshqa turdagi qoʻshimchalar ham boʻlmaydi.

Myuslining ozuqaviy qiymati shokoladniki bilan bir hil

Nonushtaga isteʼmol qilish tavsiya etiladigan mahsulotlar orasida koʻp hollarda myusli ham boʻladi, albatta. Ammo, doʻkonlarda sotiluvchi mahsulotlarning aksariyat qismiga termik ishlov berish jarayonida shirin suv ham qoʻshib yuborishadi. Shuning uchun tayyor myusli oʻrniga suli boʻtqasi yeyish sizga koʻproq foyda keltiradi. Unga meva hamda yongʻoqlardan qoʻshsangiz, mazasi ham koʻngildagidek boʻladi.

Shakarsiz muzqaymoq ham boʻladimi?

Tarkibiga shakar qoʻshilmagan muzqaymoqlar haqiqatdan ham bor, ammo ularning tarkibidagi uglevodlar keragidan ikki barobar koʻproq. Shuning uchun ishonch bilan kuniga bir nechta muzqaymoqni paqqos tushirishga shoshilmang. Undan koʻra, haqiqiy muzqaymoq sotib oling. Bu borada meʼyor haqida unutib qoʻymaslik kerak, xolos.

Navbat shokoladga: qorami achchiq?

Shirinlik yegingiz kelayotgan vaqtda parhez tutayotgan boʻlsangiz ham, bir necha boʻlak achchiq shokolad isteʼmol qilishingiz mumkin. Bitta sharti – uni toʻgʻri tanlay olish kerak. Odatda achchiq shokolad qomatga zarar yetkazmaydi, uning tarkibidagi kakao foizi qanchalik koʻp boʻlsa, shunchalik yaxshi. Achchiq shokoladni qora shokolad bilan adashtirib yubormang. Qora shokoladga yaxshigina miqdorda shakar qoʻshiladi. Achchiq shokoladni tarkibidagi kakao miqdori 70 foizdan yuqori boʻlganini tanlang.

Sushi semirishga sabab boʻlmaydi(mi)?

Bir qarashda roll va sushilar parhezbop yegulikdek tasavvur hosil qiladi. Aslida esa yapon oshxonasiga tegishli boʻlgan yegulikning guruchi yopishqoq boʻlishi uchun uni shakar bilan qovurib olishadi. Odatda sushi maxsus qaylalar bilan birga isteʼmol qilinadi, ularning ozuqaviy qiymati esa eng kamida 300-400 kkalga teng boʻladi.

• Foydali
• salomatlik