Tailandda tezyurar temiryo‘l tarmog‘i qurilishida foydalanilayotgan kran poyezd ustiga qulab tushdi. Hodisa oqibatida poyezd relsdan chiqib ketgan va kamida 22 kishi halok bo‘lgan. Bu TRT World xabar bermoqda.

Naxon Ratchasima provinsiyasi politsiyasi boshlig‘ining ma’lum qilishicha, hodisa oqibatida 22 kishi halok bo‘lgan, 30 dan ortiq odam turli darajadagi tan jarohatlarini olgan. Fojia 14-yanvar kuni mahalliy vaqt bilan soat taxminan 09:00 da mamlakat poytaxti Bangkokdan shimoli-sharqda joylashgan Naxon Ratchasima provinsiyasida yuz bergan. Tezyurar poyezd yo‘li qurilishida ishlayotgan kran harakatlanayotgan yo‘lovchi poyezdi ustiga qulagan.

“Kran poyezd ustiga qulashi oqibatida vagonlar relsdan chiqib ketgan va yong‘in boshlangan”, – deyiladi provinsiya rasmiy bayonotida.

Hozirda mutaxassislar hodisa sabablarini o‘rganmoqda, qutqaruv ishlari esa davom ettirilmoqda.

• Halokat
• Poyezd
• Tailand