Toshkent markazida 1912-yilda barpo etilgan sobiq dizel elektr stansiyasi binosi poytaxt sanoat me’morchiligining noyob namunalaridan biri hisoblanadi. Uzoq yillar davomida qarovsiz qolgan mazkur inshoot vaqt o‘tishi bilan yemirilib, butunlay yo‘qolib ketish xavfi ostida edi.

Poytaxtning eng gavjum hududlaridan birida joylashgan bu binodan tijorat maqsadlarida foydalanish, uni navbatdagi zamonaviy majmuaga aylantirish mumkin edi. Ammo tarixiy merosni asrab-avaylash va madaniyatni rivojlantirish ustuvor vazifa sifatida tanlandi.

Prezidentimiz Shavkat Mirziyoyev tashabbusi bilan tarixiy inshootni qayta tiklash va uni zamonaviy san’at rivojiga xizmat qiladigan madaniy maskanga aylantirishga qaror qilindi.

Bugun esa bir vaqtlar qarovsiz qolgan ushbu bino yangi qiyofa va mazmun kasb etib, Toshkent Zamonaviy san’at markazi sifatida o‘z faoliyatini boshlamoqda.

Yangi markaz nafaqat tarixiy obidaning saqlab qolinishini, balki O‘zbekistonda zamonaviy san’at va madaniy muloqot uchun yangi imkoniyatlar yaratilayotganini ham namoyon etadi.

Markaz mahalliy rassomlar, ijodkorlar va yosh tadqiqotchilarni qo‘llab-quvvatlash, ular uchun xalqaro hamkorlik va yangi ijodiy imkoniyatlar yaratishga xizmat qiladi.

Markaz o‘z faoliyatini ramziy ma’noga ega «Hikmah» ko‘rgazmasi bilan boshlaydi. Ko‘rgazmada 11 nafar yetuk san’atkorning ijod namunalari jamlangan bo‘lib, ular orqali moziy hikmati, ajdodlar xotirasi va zamonaviy estetikaning o‘zaro uyg‘unligi namoyon etiladi.

Bir vaqtlar qarovsiz qolgan tarixiy bino bugun san’at, ijod va tafakkur maskaniga aylanmoqda. Bu tashabbus tarixiy merosni asrab-avaylash bilan birga, uni kelajak avlod uchun yangi mazmun va yangi nafas bilan yashashini ta’minlaydi.