O‘zbekistonda 2026-yilning dastlabki sakkiz oyida laboratoriya tekshiruvlaridan o‘tkazilgan 558 nomdagi mahsulotning 73 tasi belgilangan sifat va texnik talablarga javob bermasligi aniqlandi. Bu haqda Raqobat qo‘mitasi matbuot xizmati xabar berdi.

Ma’lum qilinishicha, qo‘mita hamkor tashkilotlar bilan birgalikda chakana savdo nuqtalarida sotilayotgan xalq iste’moli tovarlarini nazorat xaridlari orqali tekshirib kelmoqda. Xarid qilingan mahsulotlar akkreditatsiyadan o‘tgan laboratoriyalarda sinovdan o‘tkazilib, ularning davlat standartlari va normativ-texnik hujjatlar talablariga muvofiqligi baholanadi.

Joriy yilning sakkiz oyida jami 60 turdagi 558 nomdagi mahsulot laboratoriya ekspertizasidan o‘tkazilgan. Tekshiruvlar natijasida ularning 73 nomdagisi belgilangan talablarga mos emasligi aniqlangan.

Talablarga javob bermaydigan mahsulotlarni savdo rastalaridan qaytarib olish va qonunchilikka muvofiq choralar ko‘rish uchun tegishli materiallar O‘zbekiston texnik jihatdan tartibga solish agentligi hamda Sanitariya-epidemiologik osoyishtalik va jamoat salomatligi qo‘mitasiga yuborilgan.

Raqobat qo‘mitasi iste’molchilar huquqlari va salomatligini himoya qilish maqsadida nazorat xaridlari davom ettirilishini ma’lum qildi. Hozircha xabarda talablarga javob bermagan mahsulotlarning aniq nomlari keltirilmagan.