Termiz tumani Do‘stlik mahallasidan saljuqiylar davriga oid oltin dinor topildi.

Xabarda aytilishicha, ushbu mahallada yashovchi Ulkan Eraliyev bog‘ni sug‘orish chog‘ida yerdan sariq metall parchasini topib, Termiz arxeologiya muzeyiga murojaat qilgan. Topilma aniqlangan joydan, shuningdek, qoraxoniylar va saljuqiylar davriga oid kulolchilik buyumlari parchalari ham topilgan.

Ulkan Eraliyev qimmatbaho topilmani belgilangan tartibda Termiz arxeologiya muzeyiga topshirgan va unga amaldagi qoidalarda belgilangan tartibda haq to‘lab berilgan.

Muzey direktori boshchiligidagi muzey mutaxassislari va numizmatlari tomonidan qimmatbaho topilma dastlabki ekspertizadan o‘tkazildi.

“Oltin dinorning old tomonida muzey numizmati doktoranti Mansur Normo‘minov “Alloh” va “Muhammad” so‘zlarini, shuningdek, arab alifbosining ayrim harflarini o‘qishga muvaffaq bo‘ldi. Tanganing orqa tomonidagi matn deyarli o‘chib ketgan. Shikastlangan, lekin yaxshi saqlanib qolgan tanga – oltin dinorning og‘irligi 1,92 grammni tashkil qilgan.  Ma’lumki, musulmon mamlakatlarida tilla tangalar “dinor”, kumush tangalar “dirham” deb atalar edi”, – deydi Madaniy meros agentligi direktorining birinchi o‘rinbosari Tursunali Kuziyev.

Qayd etilishicha, bu yil Termiz arxeologiya muzeyi ochilganiga 20 yil to‘ladi.  20 yil davomida bu muzeyda birorta ham tilla tanga bo‘lmagan.

• Oltin
• Saljuqiylar
• Termiz
• Xazina