Normativ huquqiy hujjatlar loyihalari muhokamasi portaliga Toshkent metrosidan foydalanish qoidalari hamda Toshkent metrosi faoliyatini tashkil etish tartibi to‘g‘risidagi Nizomni tasdiqlash to‘g‘risidagi Hukumat qarori loyihasi joylashtirildi.

Qayd etilishicha, mazkur hujjat Toshkent metropoliteni faoliyatini tashkil etish tartibi hamda metroda yo‘lovchilar va ularning qo‘l yukini tashish bo‘yicha xizmatlar ko‘rsatilishida tashuvchi va yo‘lovchi o‘rtasida yuzaga keluvchi munosabatlarni tartibga soladi.

Hujjat loyihasi bilan metrodan foydalanishda yo‘lovchilarning huquq va majburiyatlarini belgilovchi qoidalar ham tasdiqlanmoqda.

Jumladan, metropoliten rahbariyatining yozma ravishdagi ruxsatisiz, xizmat ko‘rsatish (texnik) xonalarida bekatlar va ob’yektlarda professional video va foto (uchuvchisiz uchish vositalari yordamida), suratga olish, shuningdek, “Prank” shaklida videolarni suratga olishga taqiq qo‘yilmoqda.

Hujjat bilan yo‘lovchilar uchun bekatdagi me’moriy bezaklarni havaskorlik foto va videotasvirga olishni amalga oshirishga ruxsat berilgan.

Bundan tashqari fuqarolarga tilanchilik, folbinlik va biron narsani olish yoki sotishni taklif etish maqsadida yo‘lini to‘sish va tegajog‘lik qilish hamda metropoliten rahbariyatining yozma ruxsatisiz vagonlarda va metropoliten inshootlarida musiqa asboblari va ovozni kuchaytiruvchi qurilmalardan foydalanishni (eshitish apparatlari va quloqchinlardan (naushnik) foydalanish bundan mustasno) ham taqiqlash taklif qilinmoqda.

Ma’lumot uchun, mazkur hujjatning “taqiqlash” qismida yo‘lovchilarning 30ta nomdagi xatti-harakatlariga taqiqlar qo‘yilgan.

Eslatib o‘tamiz, 2018-yil 1-iyundan Toshkent metropolitenida suratga tushishga va videoga olishga rasman ruxsat berilgan edi.

Ya’ni o‘sha kundan e’tiboran metropolitendan foydalanish qoidalarining foto- va videos’yomkalarni taqiqlovchi 5.11-bandi yopib qo‘yilgan va “Yo‘lovchilarning huquqlari” bo‘limida 4.2-band – “Foto-video suratga olishga ruxsat etiladi” bandi paydo bo‘lgan edi.

• Metro
• Toshkent