Bugun, 8-noyabr kuni Turkiyaning Kojaeli viloyati shimoli-g‘arbida atir ishlab chiqaruvchi fabrikada kuchli portlash sodir bo‘ldi. Hodisa oqibatida kamida olti kishi halok bo‘lgan. Bu haqda Sabah xabar berdi.

Ma’lum qilinishicha, portlash to‘lqini yirik yong‘inga sabab bo‘lgan, oqibatda butun bino alanga ichida qolgan. Yong‘in o‘chirilgach, qutqaruvchilar halok bo‘lganlarning jasadlarini topgan.

Hozirda jabrlanganlarning soniga aniqlik kiritilmoqda. Hozircha olti kishi halok bo‘lgani va bir kishi jarohat olgani ma’lum. Yong‘in sabablari noma’lum bo‘lib, tergov davom etmoqda.

Sabah nashrining xabariga ko‘ra, viloyat hokimi bayonotida yong‘in to‘liq bartaraf etilgani, hozirda binoda sovitish ishlari olib borilayotgani ma’lum qilingan. Tergov guruhi falokat sabablari va tafsilotlarini aniqlash ustida ishlamoqda.

• Atir
• Turkiya
• korxona
• portlash
• yong‘in