Xitoy sudi Myanmada firibgarlik bilan shug‘ullangan mashhur Ming mafiyasi oilasining 11 nafar a’zosiga o‘lim jazosi tayinladi. Qolgan oila a’zolari esa uzoq muddatli qamoq jazolariga hukm qilindi. BBC’ning yozishicha, bu ish bo‘yicha jami 39 kishi sudlangan.

Minglar Myanmaning Laukkay shahrida noqonuniy qimorxona, giyohvandlik savdosi va firibgarlik markazlarini boshqarib kelgan. Ikki yil oldin hududda isyonchilar nazoratni qo‘lga olganidan so‘ng, oilaning rahbari o‘z joniga qasd qilgan. Shundan so‘ng esa bir nechta oila a’zolari Myanma hukumatining topshiruvi bilan Xitoyga topshirilgan.

Xitoyning Venjou shahrida 29-sentyabr kuni bo‘lib o‘tgan sud jarayonida 11 kishi o‘lim jazosiga, 5 nafar shaxs kechiktirilgan o‘lim jazosiga, 11 kishi umrbod qamoq va qolganlarga esa 5 yildan 24 yilgacha bo‘lgan qamoq jazolari belgilandi.

Sud materiallariga ko‘ra, Ming oilasi 2015-yildan buyon firibgarlik, qimor, narkotik savdosi va boshqa jinoiy faoliyat bilan shug‘ullanib kelgan. Ular boshqargan kazinolar orqali milliardlab dollar noqonuniy daromad olingan.

• Qamoqxona
• Xitoy