O‘zbekistonning oltin-valyuta zaxiralari 66,31 milliard dollarni tashkil etib, ketma-ket beshinchi oy rekord o‘rnatdi.

Markaziy bank ma’lumotlariga ko‘ra, 2026-yil 1-yanvar holatiga ko‘ra, zaxiralaridagi aktivlarning umumiy qiymati 66,31 milliard dollarni tashkil etdi. So‘nggi oyda zaxiralar 5,08 milliard dollarga yoki 8,3 foizga, yil boshidan esa 61 foizga oshdi. Zaxiralardagi oltin qiymati ham rekordini yangilab, 55,09 milliard dollarni tashkil etdi. Ushbu qimmatbaho metall narxi bir oyda 4,23 milliard dollardan ortiq oshdi. Oltinning hajmi ham oshib, 12,6 million troy unsiyaga teng bo‘ldi. Zaxiralardagi valyuta 8,4 foizga oshib, 10,64 mlrd dollarni tashkil edi. Bunda xorijiy markaziy banklar va XVJdagi hisob raqamlaridagi valyuta zaxiralari miqdori 1,48 milliard dollar, xorijiy banklarda esa 7,63 mlrd dollar bo‘lgan. Qimmatli qog‘ozlar qiymati 5,3 million dollarga ko‘payib, 1,53 milliard dollarga yetdi. Shu bilan birga, ularning umumiy zaxiralardagi ulushi 2,31 foizgacha kamaydi.

• Oltin
• O‘zbekiston
• rekord